"Kona-ba moras dengue, ha’u hanoin prevensaun hala'o maka’as hela, halo fogin ou rega susuk iha fatin-fatin”, dehan nia iha plenária Parlamentu Nasionál (PN), segunda (17/01).
Tanba agora dadauk atividade rega susuk ka fogin ne'e iha Munisípiu Dili, Governu hala'o namanas hela ba fatin sira ne'ebe mak identifika iha risku ba moras dengue.
"Iha kinta feira (semana-kotuk), halo iha Aimutin, iha área sira ne’ebé deteta katak dengue sa'e maka’as, e sira ba halo fogin iha ne'eba e ba komunidade iha fatin hothotu”, hatete nia.
Deputadu bankada KHUNTO, António Verdiál hatete, Governu liuhusi Ministériu Saúde presiza buka meiu atu kombate moras dengue iha rai laran.
"Bankada KHUNTO husu ba Governu, espesialmente ba Ministériu Saúde ho nia estrutura tomak, inklui Ajente saúde hotu iha nivél nasionál, munisípiu, postu administrativu, suku no aldeia hamutuk ho sosiédade atu buka meiu oinsá hodi bele kombate moras dengue ne’ebé oras ne'e sa'e maka’as iha ita-nia rai”, dehan nia liuhusi deklarasun polítika iha plenária PN, tersa (18/1).
Deputada Bankada CNRT, Vergína Ana Belo hatete, nia parte apoiu no sekunda informasaun ka preokupasun husi deputadu sira liga ba moras dengue, tanba maske númeru dengue kontinua aumenta no hamate populasaun sira, maibé Governu laiha polittika halo fomigasaun iha fatin risku sira.
"Ami lahatene Governu nia politika liga ba ida ne'e to'o iha ne'ebe, laiha fomigasaun ba fatin-fatin no bairo sira ne’ebé ema hetan tiha ona moras, ne'e perigozu teb-tebes tanba ida ne'e bele da'et”, dehan nia. (*)