Tempotimor (Dili)-Ministra Saúde (MS), Odete Maria Freitas Belo, deklara ofisialmente Variante Delta Covid-19 da'et ona ema na'in 4 Timor-Leste (TL).
"Aproveita Komunikadu Imprénsa ohin, atu informa ba públiku katak, rezultadu sekuensiasaun genómika husi amostra 300 ne’ebé Laboratóriu Nasional Saúde haruka iha dia 14 de Jullu de 2021 ba Peter’s Doherti Institute iha Melbourne, Australia, ho pedidu atu halo tes urjenti ba amostra balun, hadutu katak, amostra husi ema na'in 4 ne’ebé tama husi Indonézia iha dia 26 de Juñu ho dia 8 de Jullu, iha lineajen B.1.617.2 (Delta), variante ne’ebé preokupante, ka ‘’variant of concern’’,informa Ministra Odete, liuhusi Konferénsia Imprénsa iha Centro Convenções de Dili, sesta (23/07).
Maibé, sira na'in 4 ne’e iha hotu ona fatin kuarentena no izolamentu, 1 negativu ona, no fila ona ba uma, na'in 3 sei nafatin sei iha izolamentu.
Maske nune'e, to’o oras ne'e seidauk iha evidénsia katak Variante Delta ne’e, hada’et ona iha komunidade.
Tanba ne'e, atu evita moras ne'e husi TL, husu ba populasaun sira hotu atu partisipa iha programasaun nasional vasinasaun Covid-19.(*)
