“Kobertura ba vasinasaun covid19, nian iha munisípiu Covalima, Dili no Vikeké maka’as liu iha territóriu Timor-Leste tomak. Husi populasaun Dili hamutuk 126,570, liuhusi pursentu 58, pursentu 40 liuhusi populasaun Vikeké hamutuk 18.141, no Covalima iha populasaun 40.227 ho pursentu 50”, informa Potavóz Komisaun Interministerial ba Implementasaun Vasina Covid19, Danina Coelho, iha salaun MSSI, Kaikoli, sesta (23/07).
Tanba ne'e, agradese ba autoridade lokál no komunitáriu sira ne'ebé halo ona kampaña sosializasaun hamutuk ho médiku sira hodi eduka populasaun sira ba vasina, iha munisípiu tolu ne'ebé ho partisipasaun aas liu kompara ho munisípiu sira seluk.
“Ami mós hakarak informa katak, iha aumenta maka’as no lais husi populasaun elejível ne'ebé simu vasina iha munisípiu Dili no Vikeké, no agradese ba membru komunidade tomak, autoridade lokál, lideransa relijióza no pesoál saúde sira ne'ebé asegura nafatin ema sira idade tinan 18 ba leten atu simu sira-nia vasina lalais”, dehan nia.
Maske nune'e, enkoraja komunidade sira iha munisípiu hothotu atubele simu vasina iha tempu badak, hodi proteze-an husi moras Covid-19.
“To'o ohin loron, maizoumenus ema hamutuk na’in-262.933 (35%) mak, simu ona vasina ba doze dahuluk nian no ema na’in-74.918 (10%) mak simu ona vasina nian iha territóriu tomak”, informa nia.
Tuir dadus, populasaun iha territóriu tomak simu ona vasina dalaruakho vasina AstraZeneca hamutuk 298.743, no vasina Sinovac hamutuk 39.108 kompleta ona vasina. (*)
