Tuir  koordenadór forsa tarefa ba prevensaun no mitigasaun surtu Covid-19 iha Timor-Leste, Rui Maria de Araújo katak, pesoál saúde ne'ebé servisu iha ospitál referénsia Maliana na'in 11 detetadu pozitivu Covid-19.

"Profesionál sira ne’ebé servisu iha óspital refrénsia Maliana hamutuk 130, iha loron tolu ikus ne’e na’in 11 detetadu pozitivu Covid-19 ka atinje (8,8%),” dehan Rui liuhusi konferénsia imprensa ne’ebé realiza liuhosi zoom, Sesta (21/5).

Portavóz ne’e akresenta, liga ba kazu foun ne’e ekipa vizilánsia epidemolójika no ekipa vizilánsia sentinela kontinua halo rastreiu iha ospitál refere, tanaba konsidera iha ona kontaktu (Contact trasing).

“Rastreiu sei kontinua halo nafatin iha ospitál ne’e no ohin servisu  konsulta esterna    suspende temporariamente, atendimentu,  maibé servisu emerjénsia, maternidade no internamentu seluk, kontinua funsiona. Maski iha médiku no enfermeiru lubuk ida maka tenki tama kuarentena, tamba kontaku besik ho sira ne’ebé pozitivu," informa Nia.

Entretantu, kazu konfirmadu foun iha munisípiu Bobonaru hamutuk na’in walu. Nune’e kazu komulativu konfirmadu iha munisípiu refere sa’e ba 452, ne’ebé na’in 40 mak kontinua ativu, na’in 412 mak rekuperadu ona.  

Alende ne’e, pesoál saúde na’in haat mak grave on aba Covid-19 iha izolmentu Vera Cruz ne’ebé na’in rua uza ventiladór no na’in rua seluk uza oxijéniu.

“Iha (21/5/21) halo tratamentu ba kazu detetadu na'in-36. Ne’ebé iha área obstetrisia na'in 13, medisina interna na'in 22 no pediátria na’in ida. Maibé husi sira na'in 22 iha medisina interna na'in haat mak grave ne’ebé rua iha ICU no uza ventiladór no na’in rua uza oxijéniu,” dehan Nia.(*)