Tuir Koordenadór Forsa Tarefa ba Prevensaun no Mitigasaun Surtu Covid19 iha Timor-Leste, Rui Maria de Araújo hatete, ohin (Domingo, 16/05) sidadaun Xineza ida mate ne'e tanba Covid-19 la’ós mate ho Covid.
"Ida ohin mate iha Vera Cruz sidadaun Xineza ne'e mate tanba Covid, ne'e klaru loos, tanba laiha tan komorbidade eh nia tama iha Ospitál Nasionál Guidu Valadares (ONGV) ho sindroma in-sufisiénsia respiratória águda depois deteta SARC COV-2" dehan Portavós Sentru Integradu Jestaun Krize, Sala Situasaun (SIJK-SS) Rui Maria de Araújo liuhusi zoom conference, Domingu (16/5).
Koordenadór ne'e hatutan, kazu óbitu na’in sia seluk ne’ebé antes ne’e mate, Ministériu Saúde (MS) sei klarifika iha loron tuir mai, tanba sei iha investigasaun.
"Kona-ba hira mak mate ho Covid no hira mak mate tanba Covid ami sei hato'o iha loron tuir mai tanba sei halo análiza ba dadus ne'ebé iha,” hatutan Nia.
Entretantu dadaun ne’e Timor-Leste rejista ona kazu obitu hamutuk na’in 10 ne’ebé kompostu husi sidadaun nasionál na’in 9 no sidadaun Xineza na’in ida.(*)