Nia haktuir, mane ho idade 16 ne'e baixa iha 24 janeiru, teste dahuluk foti iha 28 janeiru no teste daruak iha 01 fevereiru no rezultadu negativu tuituir malu.

Nune'e mós feto ho idade 29, baixa iha 23 janeiru, teste dahuluk foti iha 28 janeiru no teste daruak foti iha 01 fevereiru no rezultadu hatudu negativu tuituir malu.

"Nune’e pasiente rua refere ohin alta ona sala izolamentu Vera Cruz Dili hodi fila ba sira-nia família no komunidade," Odete Viegas informa liuhosi Konferénsia Imprensa, iha Palásiu das Cinzas, Kaikoli, tersa(2/2).

Nia Informa ba públiku tomak katak regra Estadu Emerjénsia ba da-sanulu nian ne’e signifika sidadaun hotu-hotu tantu sidadaun nasionál no internasionál sei submete ba kuarentena obrgatóriu, exeptu ba nível diplomata sira.

"Ministériu Saúde liuhusi ekipa vijilánsia dezigna tiha ona fatin ka ótel ne’ebé sai hanesan kuarentena ba sidadaun sira-ne’ebé atu tama mai Timor-Leste," Odete katak.

Nia apelu ba ema hotu atu halo tuir prátika medida preventiva no hametin vizilánsia iha fronteira.

"Ba komunidade ne’ebé iha síntoma hanesan isin-manas, me’ar no inus-been, favór ba konsulta iha fasilidade saúde ne’ebé besik," Odete fó hanoin ba sidadaun tomak.(*)