Bolseira Pós Laborál Enfarmajen no Parteira 180 ne'e kompostu husi parteira 90 no Emfarmajen 90 atu tuir formasaun durante tinan 2 iha UNTL
Magnífiku Reitór UNTL João Soares Martins, esplika objetivu ida ohin asina MOU ho MS ba entrega bolseiru pós laborál Enfarmajen no Parteira, atubele hahú ona ensinu aprendizajen.
"Atu forma de'it kursu Diploma III, nune'e lisensiatura la persiza halo ba rai-li'ur, UNTL prontu atubele oferese kursu sira ne'e ba entidade," Magnífiku Reitór ko'alia iha Palásiu das Cinzas, Kaikoli, segunda(1/2).
Reitór ne'e hateten, UNTL só haruka kursu ba rai-li'ur ne'e, enkuantu sira-ne'ebé maka iha rai laran laiha, hanesan espesialidade emorrajia no kardiolojia.
"Iha HNGV rasik iha hotu kondisaun atubele halo formasaun tanba dezde 2007 hahú formasaun no ema la rekoñese, maibé HNGV halo ninia kna'ar ida halo formasaun ba pesoál saúde dezde 2007 mai to'o agora, nunee atu reforsa liután de'it ospitál bele hala'o kna'ar hamutuk ho entidade atubele servisu di'ak liután kona-ba formasaun no rekursu barak liután iha área saúde nian", dehan Reitór.
Reitór haktuir, fasilidade iha área jerál iha sufisiente atubele halo formasaun, ba sira ne'ebé maka mai ho espesialista konserteza sira sei la halo iha Timor
Purtantu, Ministra da Saúde, Odete Maria Freitas Belo, kooperasaun ne'e kontinua nafatin atu bele eleva pesoál saúde sira-nia koñesimentu.
"Ajuda sira ko'alia di'ak liután sira-nia abilidade atu servisu la'ós iha matenek de'it, maibé la'o tuir ona saúde nia funsaun, nune'e iha formasaun ne'ebé maka iha, ita espera katak sira bele iha abilidade la'o tuir evolusaun," dehan Ministra Odete.
"Ita hakarak durante formasaun adaptasaun ita hakarak, labele falta, labele moras, akompaña matéria durante tinan rua, depois hotu maka ita atu tau sira ba iha-ne'ebé ne'e depende ba iha sira-nia esperiénsia idak-idak," Ministra Saúde ne'e hatutan.(*)
