Hafoin evakua husi Sidade Wuhan, Xina ba Nova Zelándia, estudante bolseiru timoroan 17 kontinua karentina durante semana rua, iha Whangaparāoa, Nova Zelándia.
Hafoin halo observasaun laiha sintoma Corona Virus (COVID 19), nune'e estudante sira hahú halo ona viajen ba Bali-Indonezia hodi kontinua Timor-Leste.
"Ita-nia estudante sira ne'e konfirmadu hotu ona, sira hetan sertifikadu médiku sira husi Nova Zelándia nian katak sira livre husi Corona virus. Sira akontonadu semana rua no sai ona hela iha otél," dehan Sekretáriu Jerál MNEK, Jorge Trindade Neves de Camões, iha Palásiu Prezidensiál, Bairru-Pité, Kinta (20/2).
Nia hatutan, dadaun ne'e estudante sira ne'e iha ona aviaun halo viajen ba Bali-Indonézia no aban, Sesta (21/2), sira sei to'o iha Timor.
Antes ne'e, Governu Nova Zelándia evakua ona estudante timoroan 17 ne'ebé estudu iha Wuhan-Xina, iha Kuarta (5/2), ba Whangaparāoa, Nova Zelándia, hodi halo tratamentu no izolamentu. (*)