Virus Corona inisiu mai husi provínsia Hubei, iha Wuhan-Xina, dezde dezembru 2019, nune'e hahú espalla makaas Janeiru 2020.
Informasaun ikus liu, ema na'in 80 mak mate no na'in 2.744 maka da'et virus ne'e.
Ne'e duni, deputadu PN fo atensaun ba Governu atu tau konsiderasaun ba situasaun ne'e nu'udar emerjénsia nasionál hodi halo prevensaun.
"Orsida ka aban ita Parlamentu Nasionál no Governu tuur hamutuk hodi foti solusaun ba moras ne'ebé dadaun la'o hela. Tanba ne'e emerjénsia duni ita presiza ko'alia iha tempu badak", deha deputadu Mariano Assanami Asanami, iha Uma Fukun PN, Segunda (27/1).
Antes ne'e, Konsellu Ministru (KM) aprova ona adezaun Regulamentu Sanitária Internasionál (RSI) atu evita moras ne'ebé espalla hela iha mundu hanesan Virus Corona.
Ministra Saude interina, Elia dos Reis Amaral hatete, Governu aprova ona RSI atu haforsa kapasida vizilánsia no mós atu responde ba asuntu emerjénsia sira iha saúde públiku nian.
Nune'e, agora presiza hadi'a fila-fali regulamentu ne'e atu bele hadi'a kondisaun tekníka hodi deteta, avalia, notifika no komunika para bele responde ba saude públiku iha nivel internasionál nian.
Nia afirama, hasai mos rezolusaun governu ida hodi husu apoiu ba liña ministeriál, liuliu iha parte vizilánsia no atu kontrola no prevene di'ak liután moras ne'ebe ameasa ba saúde públiku rasik.