Enfermeira DX: Ha’u La Lori Sai Aimoruk, Maibé Soru-been De’it

Soru ben kaixa rua ne'ebe foti husi ONGV sei tau hela iha uma enfermeira ida ne'ebe deskonfia foti sai sasan mediku husi Ospital Bidau, (23/11) Soru ben kaixa rua ne'ebe foti husi ONGV sei tau hela iha uma enfermeira ida ne'ebe deskonfia foti sai sasan mediku husi Ospital Bidau, (23/11) foto tempotimor.com

 Tempotimor (Dili)-Enfermeira ida ho inisial DX ne’ebé deskonfia lori sai aimoruk husi Hospital Nasional Guido Valadares (HNGV) deklara katak kaixa haat ne’ebé nia tula dala rua la’os aimoruk, maibé soru-been.

Enfermeira ne’e mós hatete katak, nia la lori soru-been ba klinika hodi fa’an, maibé nia foti sai atu ba salva ema-nia vida.

Lee mos notisia : Deskonfia Ema Lori Sai Sasán Médiku Husi HNGV

“Ha'u la hasai ai moruk husi ospital. Maibé ha'u foti soru-been de'it. Maibe kuandu sira temi aimoruk ne'e ambolas ida ka tablet ida mós hau la foti sai. Soru-been loos de’it mak ha’u lori sai ba uma. Mais ida ne'e mak agora sira duun fali ha’u lori sasan, aimoruk husi ospital depois ha'u-nia primu mak tula sai ho karreta ba faan iha perbatasan ka Atambua ne'ebá, ne'e la loos,” deklara DX ba Tempotimor.com, via telephone, foin lalais.

DX mós hatete, nia la simu akuzasaun iha media sosial Facebook katak nia hasai aimoruk husi HNGV hodi ba fa’an iha klinika privadu balun.

"Ha'u la lori ba faan ba klinika mais ha'u lori ba hodi salva ema-nia vida. Dala ida tan, ha'u la'os foti sai soru-been ne'e ba faan hodi ha'u bele haan no hemu e ohin loron bele selu ha'u-nia oan sira-nia eskola, ne'e la'e. Ha'u foti ne'e atu salva ema-nia vida,” DX afirma.

Kona-ba pasiente ne’ebé nia fó asistensia ho soru-been ne’ebé nia lori sai, DX dehan, molok ne’e pasiente ne’ebé nu’udar mós nia apa kiik ne’e hetan operasaun dala rua iha HNGV hafoin rekopera, pasiente ne’e alta no DX lori fila ba Laivai, Munisipiu Lautem.

Maibé, iha 6 Novembru, nia apa kiik sofre moras no lori fila fali mai Dili. Nia husu atu ba halo tratamentu iha HNGV maibé nia apa kiik ne’e rekuza, ho nune’e DX deside hodi fó rasik asistensia saúde.

Nia rekoñese katak, nia foti soru-been kaixa haat. Kaixa rua nia foti iha 8 Novembru no kaixa rua seluk foti iha 12 Novembru.

“Ha’u laiha transporte entaun ha’u telefone ba ha'u-nia primu mak mai ajuda tula lori ba ha'u-nia uma,” nia esplika.

Entretantu, hafoin kazu ne’e mosu iha públiku no hetan reasaun oioin, enfermeira DX hato’o karta deklarasaun ida ba ninia superior hodi rekoñese ninia sala.

Enfermeira ne’e fó razaun katak, nia obrigatoriamente tenke foti subar aimoruk refere tanba hakarak salva nia aman kiik ne’ebé sofre moras no hala’o tratamentu privadu iha ninia hela fatin.

Liu husi nia karta, DX esplika kona-ba kronolojia nia foti aimoruk iha loron rua nia laran, iha 8 no 12 Novembru 2019.

Maske nune’e, DX la esplika klaru iha nia karta sa oras no oinsa nia bele foti subar aimoruk ne’e no nia uza karreta saida. Maibé tuir informasaun katak nia uza karreta Zeep no hasai aimoruk iha tempu kalan.

Enfermeira ne’ebé serbisu iha Departamentu Cirugia Homen, HNGV ne’e dehan, iha 8 nia foti subar soru-been vasi 09% litru ida hamutuk kaixa ida. Hafoin iha 12 Novembru nia foti tan kaixa ida.

DX dehan, nia foti aimoruk refere hodi halo tratamentu ba nia aman kiik ne’ebé sofre moras.

“Ha’u foti aimoruk hodi halo tratamentu liu husi diagnostika Bph ho objetivu atu halo regular bladen irrigation ba pasiente ho naran (inisial) SV, tinan 64, ha’u-nia aman kiik, husi Lautem,” deklara enfermeira ne’e liu husi karta deklarasaun ne’ebé hato’o ba Xefe Departamentu Cururgia-Homen, HNGV, iha 18 Novembru 2019.

Nia rekoñese katak, nia la husu autorizasaun husi Xefe Departamentu tanba hakarak atu fó asistensia saúde ba pasiente ida ne’ebé nia hadomi no respeita tebes iha nia moris tomak.

“Hahalok ida ne’e la seluk, maibé tanba de’it responsabilidade moral no sosial nu’udar profisional saúde atu tulun pasiente ne’ebé hela ho ha’u,” deklara enfermeira DX.

Iha ninia karta, DX mós husu ba superior hirarkia HNGV atu responsabiliza hahalok ne’ebé nia komete ona.

“Mak ne’e de’it deklarasaun ha’u halo ba exelensia sira nu’udar superior hirarkia hodi responsabiliza hahalok ne’ebé temi iha leten. Nu’udar funsionariu públiku ha’u sei hakruk ba orientasaun superior sira nian hodi la repete tan iha futuru,” dehan nia.

Iha parte seluk, karreta Zeep nia nain ne’ebé hetan kontaktu husi Tempotimor.com hatete, iha 8 Novembru kalan nia simu kontaktu husi nia prima, DX, ne’ebé husu ajuda atu tula nia iha ospital.

“Iha 8 Novembru kalan, nia telephone ha’u husu atu ajuda tula nia iha ospital ho kaixa soru-been ba nia uma tanba nia apa kiik moras. Ha’u mós la hatene infeksaun ka saida. Depois iha fali dia 12 kalan mós nia telefone fali ha’u ba tula tan. Ha’u tula tan ne’e hamutuk kaixa haat, tan ba ba tula pertama kaixa rua no segundu mós kaixa rua,” dehan nia.

Karreta-nain ne’ebé lakohi públika nia identidade ne’e hatete, bainhira to’o iha ospital, DX mak foti kaixa hodi hatama ba kareta laran.

“Ha’u la hatene buat Ida. Ha’u ba ne’e tanba ha’u-nia prima ne’e telefone mai husu ajuda. Ha’u ajuda tiha ema depois sai fali vitima ne’e mak la di’ak ne’e,” dehan nia.

Rate this item
(5 votes)
Last modified on Thursday, 28 November 2019 08:19
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com