Primeiru Responsável ba Ekipa Servisu Kombate Moras Dengue (ESKD) husi Estudante Voluntáriu, José Cardoso Morreira informa, kontinua halo sensibiliza prevensaun moras Dengue ba Estudante sira.

“Objetivu husi sensibilizasaun ne'e atu fó informasaun ba estudante sira oinsá atubele kuidadu sira-nia an, antes mai eskola tenke uza autan, tenke uza faru liman naruk sira, hodi bele halo prevensaun ba moras dengue ne'e”, dehan Responsável José Cardoso ba www.tempotimor.com iha Fatumeta, segunda (14/03).

Tanba informasaun kona-ba moras Dengue ne’ebé fahe ba estudante sira ne'e parte importante ida atu oinsá estudante sira prevensaun molok ba eskola.

“Objetivu seluk mak sira mós halo limpeza iha bee lihun sira, tanba ida ne'e mak ami halo aprosimasaun ba Diretór Eskola sira oinsá mak bele hamoos bee lihun ne'e”, afirma nia.

Ho akontesimentu inundasaun iha fulan kotuk liuba hamosu bee nalihun iha eskola EBC Fatumeta, tanba ne'e mak tenke hamoos no hamaran área eskola ninin sira.

Tuir observasaun ne'ebé www.tempotimor.com nota katak, estudante sira iha interrese no vontade hodi rona informasaun kona-ba informasaun prevensaun moras dengue ne'ebé ekipa volutáriu hato'o ba estudante sira.

Dadus ne'ebé publika iha Ministériu Saúde ema ne'ebé mate tanba moras Dengue hamutuk 35, no totál dadus pasiénte afeta dengue rejista husi loron 9-11 fulan-marsu hamutuk 1.991. (*)