Deputada bankada CNRT, Veneranda Lemos hatete, nia parte lamenta tebes ba hahalok ne’ebé hatudu husi membru UPM nu’udar mós lutu nasaun nian komete krime ida ne'e hodi hakotu ema nia vida.

"Ha'u lamenta, nasaun ninia lutu baku mate sidadaun ida iha Suai-Loro, e lamentavelmente, bainhira ita hasa'e taxa ba konsumu alkol, sira tua lanu mak hodi baku mate. E ha’u husu para fó seguimentu ba situasaun ida ne'e, tanba ida ne'e krime, baku mate ema, baku nia família, ha’u lahatene razaun saida”, dehan nia iha plenária PN, tersa (25/01).

Ba kazu ne'e, Bankada CNRT kongratula Komandante PNTL Covalima ne’ebé foti medida hodi detein membru UPM na’in-neen ne’ebé nu’udar autór ba  krime ida ne'e.

Deputadu Bankada PLP, Abel Pires husu Governu presiza tau atensaun maka’as ba disiplina ajente PNTL sira-nian tanba kazu agresaun fiziku ida ne'e akontese bebeik ona.

Matebian Julio Amaral konsege hakotu iis, tanba hetan agresaun fiziku husi Membru UPM iha Suai, no matebia husik hela nia oan na’in-tolu ho fen.

"Ha’u hanoin parese ba membru sira ne’ebé mak labele kontrola sira-nia emosaun ne'e muda tiha sira ba servisu seluk para laiha tan koresaun ba ita-nia populasaun sira, ne'e tenke halo se lae tinan-tinan mai sempre rona hela de'it istória sira ne’ebé asaun”, dehan nia.

Tuir loloos ema ne’ebé mak uza farda no kaer kilat la merese halo fali agresaun ba fali populasaun sira ne’ebé kbi’it laiha para kontra.

Tanba tuir informasaun ne’ebé iha, membru UPM hirak ne'e mós baku sidadaun feto ne’ebé mak hanesan feton ida, to'o oin bubu hotu.

"Ha'u hato'o ona informasaun ne'e ba señor Komisiáriu ho Adjuntu mais ha’u tenke ko’alia iha ne'e para hatudu katak atetude hanesan ne'e ita labele tolera”, afirma nia. (*)