Komadante Eskuadra Dom Aleixo, Inspetór Asistente, Americo F.da Costa deklara, horikalan kazu laen oho nia feen iha suku Bebonuk, Aldeia 20 Setembru, iha oras 10:51 ne'e tanba feen husu osan atu selu labarik nia eskola.
"Sim Kazu horikalan ne'e kazu Violénsia Domestika, kazu ne'e feen ho laen mak halo Violénsia ba malu, iha Bebonuk, Aldeia 20 Setembru iha Tuku 10:51, motivu husi kazu ne'e tanba feen husu osan atu selu labarik nia eskola, nune'e nia foti tudik sona nia feen iha kedas sira-nia kuartu”, dehan Inspetór Asistente Americo iha Eskuadra Dom Aleixo, Aimutin (20/01).
Hafoin akontesimentu PNTL eskuadra Dom Aleixo to’o kedas fatin hodi kaptura suspeitu ho Inisiál ACP lori kedas ba sela munisípiu Dili.
"Sona nia feen iha fatin barak, ne'ebé Vítima mate kedas fatin, ninia la’en ne'e ami to’o mak foin foti nia tudik ida nia kaer hodi sona nia feen ne'e”, esplika nia.
Kazu refere prosesa ona hodi submete suspeitu ba Ministeriu Públiku no Vítima dadaun ne'e iha ona Ospital Nasionál Guido Valadares (HNGV) hodi halo otopsia. (*)