“Iha estadu diretu demokratiku ida ne'e, ita presiza duni atu hari’i ita-nia sistema judisiariu ne'ebé mak forti no kualidade. E Entaun iha oitavu Governu konstituisionál, hanoin katak presiza duni ita atu halo reforma judisiáriu, hodi haree ita-nia lakuna sira ne'ebé mak iha, durante ita 20 anos ukun-an”, esplika nia iha plenária Parlamentu Nasionál (PN), kuarta (13/10).

Dadauk Governu liuhusi Ministériu Justisa servisu hamutuk ho Komisaun A iha Parlamentu Nasionál, hodi inisia Lei Organizasaun Judisiáriu tanba bazeia ba mekanizmu husi Konstituisaun Repúblika.

“Razaun ida ne'e mak Governu iha inisiativa tuir mekanizmu konstituisionál, atu estabelese (hari’i) organizasaun judisiáriu no estatutu majistradu ninian. Atu nune'e ita bele prienxe lakuna sira ne'ebé mak durante ne'e iha ita-nia sistema judisiáriu”, dehan nia.

Durante ukun to'o agora, Timor-Leste kontinua utiliza regulamentu husi UNTAED hanesan, lei númeru 11/2000 6 de marsu kona-ba organizasaun judisiária nian.

Tanba ne'e, pozisaun Governu deside reforma regulamentu UNTAED nian, no hadi’a lakuna kona-ba  sistema judisiáriu ne'ebé mak mosu iha Timor-Leste.

“Ho ida ne'e mak ami Governu agradese komisaun A trata asuntu Justisa no Konstituisionál, konsege halo diskusaun ho Governu ho tempu lubuk ida, ne'ebé konsege aprova pur artigu iha norma sira ne'ebé mak mensiona iha esbosu lei ida ne'e”, dehan nia.

Maibé husu ba deputadu sira atu aprova lei Organizasaun Majistradu Judisiáriu iha finalidade atu nune'e fasilita Governu hodi hari’i sistema judisiáriu ne'ebé forte. (*)