"Loos duni, atu ko'alia kona-bá oinsá mak atu mídia sosiál sira ne'e atubele la'o tuir dalan, ha'u hanoin iha tempu liubá prokuradór jerál do Estadu, nia lori ona projetu ida mai aprezenta iha Parlamentu kona-bá krime sibernétika. Soku ba ida ne'e ita-boot sira aprova. Ida ne'e mak fó dalan ba Governu atubele haree halo nusá mak atu kriminaliza halhalok sira ne'ebé mak tama iha área kriminál”, dehan Ministru Asuntu Parlamentár no Komunikasaun Sosiál (MAPKomS), Francisco Martins Jerónimo iha plenária PN, tersa (21/09).
Tanba, ID (Identidade) falsu sira ne’ebé ko'alia buat ruma, halo ameasa ka halo terór ba ema seluk iha Mídia Sosiál, ne'ebé haree identifika katak ne'e tama iha área kriminál, entaun bele prosesa.
"Agora ida ne'e rasik, oras ne'e ha'u hanoin iha ona meza Parlamentu ninian, ba parlamentár sira ona, ha'u hanoin ami entrega ba ita-bo'ot sira mak diskute, deside, atu nune'e bele fó ba ami, e ami bele implementa tuir lei”, hatete nia.
Maibé ko’alia filafali ba kestaun atu regula mídia nasionál sira iha rai laran, ida ne'e Governu nia papél mak atu kria kondisaun de'it maibé tuir kontstituisaun PN mak iha kompeténsia atu halo lei komunikasaun sosiál. Enkuantu, lei refere agora dadauk Parlamentu halo ona no to'o oras ne'e parte Governu ezekuta hela, tuir nia padraun ne'ebe vigór.
Maske nune'e, Governu sei labele ba halo intervensaun direta ba servisu mídia nian, tanba iha lei komunikasaun sosial mós hatete katak, konsellu imprensa mak iha kompeténsia atu sai reguladór no kontrolu ba mídia hotu iha Timor-Leste.
"Hanesan Governu prepara kondisaun de'it, maibé la ba halo intervensoens ba parte sira ne'e hotu”, afirma nia. (*)