"Konsellu imprensa kondena maka'as átu violensia, amesas no diskriminasaun hosoru média no jornalista sira durante ne'e", dehan Prezidente Konsellu Imprensa, Virgilio Guterres, iha Bekora-Dili, Sesta (3/5).

Dezde tinan 2016 to'o 2019 Konsellu Imprensa rejista ona keixa mai husi jornalista, asosiasaun jornalista, públiku no instituisaun estadu nian.

Nia hatutan, keixa ne'ebé hato'o ba Konsellu Imprensa kona-ba violénsia, amesa no diskriminasaun hasoru jornalista sira bainhira halo kobertura iha terenu. Husi numeru kazu sira ne'e komete barak husi ajende estadu nian.

Dadus no fáktu foun iha tinan 2019 hatudu pesoal balun instituisaun estadu no governu halo ameasa no bandu jornalista sira atu labele espresa sira nia hanoin kona-ba asuntu ne'ebé relasiona ho interese públiku nian.

"Konsellu kondena maka'as aktu Ministru Negósiu Estranjeiru no Kooperasaun (MNEK), Deonísio Babo ne'ebé hapara distribuisaun Jornal INDEPENDENTE nian ne'ebé nu'udar aktu boikota no sensura ida ba fluxu informasaun iha pais demokrátiku no aktu ne'e parte ida taka dalan ba sidadaun sira atu asesu ba informasaun ne'ebé hatuur ona iha konstituisaun RDTL", tenik Prezidente KI.

Konsellu Imprensa kondena maka'as ba aktu sira ne'e tanba nu'udar orgaun reguladora, bazeia ba Lei Komunikasaun Sosiál, ne'ebé fó kompetensia hodi supervizaun orgaun komunikasaun sosial no servisu jornalistiku iha Timor Leste.