“Ha’u nu’udar Prezidente Tribunál Rekursu ohin halo ho Prezidente Repúblika atu ko’alia kestaun balun ne’ebé iha servisu Tribunál nian atu haree katak iha servisu balun ne’ebé la’o ba oin ne’e to’o iha ne’ebé ona, servisu balun ne’ebé presiza hala’o dadaun no servisu balun ne’ebé presiza hala’o iha futuru mai”, dehan nia, iha Palásiu Prezidensiál Bairru-Pité, Segunda (15/4).
Iha soru-mutu ne’e, Prezidente TR no Prezidente Repúblika ko’alia mós oinsa bele hamosu tan kondisaun balun ne’ebé di’ak ba autor judisial sira nian, liu-liu ofisial justusa sira nian ho funsionáriu sira nian ne’ebé servisu iha Tribunál.
“Oinsa mak bele servisu hamutuk ho parte governante sira seluk, liu-liu parte Parlamentu Nasionál, Governu ho apoiu Prezidente Repúblika nian bele hamosu tan regra balun ne’ebé bele regula materia sira espesializadu liutan atu bele apoiu servisu Tribunál nian ne’ebé bele di’ak liu tan iha aplikasaun iha servisu iha desizaun sira ne’ebé bainhira prosesu ruma mosu iha Tribunál nian”, tenik Deolindo.
Entretantu, Prezidente Repúblika, Francisco Guterres Lú Olo mós fó apoiu ba servisu Tribunál nian hodi bele la’o ho forsa no di’ak liután, inklui tentativa atu ko’alia ho orgaun sira seluk hanesan Parlamentu Nasionál no Governu para bele haree ba kestaun hirak ne’ebé presiza atu haree hamutuk ba interese nasional.