Prezidente Tribunál Rekursu Deolindo dos Santos hatete, distribuisaun pakote orsamentu ne'ebé governu atribui ba tribunál sira hotu hamutuk 6 milloens liu, maibé depois sira halo estudu klean liu tan ba orsamentu ne'ebé governu atribui, la sufisiente, nune'e sira husu tan pedidu adisionál ba governu ho montante orsamentu 5 milloens resin.
"Ami sente katak orsamentu ne'e la to'o, entaun ami halo tan pedidu adisionál ba orsamentu tribunál sira nian, ami halo tan 5 milloens itál, nune'e, totál orsamentu mak ami halo aprezentasaun ohin ne'e, hamutuk 11 milloens itál", hatete Prezidente Tribunál Rekursu (TR), Deolindo dos Santos hafoin remata halo aprezentasaun orsamentu TR nian iha Ministériu Finansas (MF) iha Aitarak Laran, tersa (22/09).
Nia dehan, husi totál orsamentu ne'ebé sira aprezenta, atu ne'e atu bele kobre nesesidade tribunál sira nian, la'ós tribunál rekursu de'it, ba tribunál hotu-hotu liuhosi orsamentu 2021 nian.
"No entantu, ida ne'e maka atu bele fó resposta ne'ebé di'ak ba servisu tribunál nian", dehan nia.
Nia hatutan, ho orsamentu ne'ebé iha ne'e sira la halo buat foun, tanba programa ne'ebé iha ne'e sira prevé tiha hotu ona iha orsamentu 2020 nian, ne'ebé ke la aprova, entaun sira lori fali hodi tau iha 2021 nian para governu no PN bele aprova atu bele hala'o tinan oin nian.
