Login to your account

Username *
Password *
Remember Me

Asaun CAC Buska no Aprensaun ba MAPKomS Sei Halo Moe TL iha Futuru

Ekipa CAC halo hela buska no aprensaun ba gabineti MAPKomS, iha palasiu governu. Ekipa CAC halo hela buska no aprensaun ba gabineti MAPKomS, iha palasiu governu. Foto Suplay

Tempotimor (Dili)-Asaun husi Komisaun Anti Korupsaun (CAC-sigla portugés), ne’ebe halo buska no apresaun ba sasan iha Gabineti Ministru Asuntu Parlamentar no Komunikasaun Sosiál (MAPKomS), Francisco Martins da Costa Pereira Jerónimo, sei halo moe Timor-Leste iha futuru.

Tanba, asaun CAC halo buska no apreensaun ida-ne'e mosu derepente, laiha karta ida ne'ebé Tribunal no CAC haruka antes ba Ministru.

"Buska ne'e mos, ha'u la halo flagante delitu ne'ebe halo fali OTT, ou halo problema ruma flagante delitu, tenke ba kaer kedas lori kedas, ha'u horseik hamnasa de'it, tanba ha'u lakohi atu hatete naran saida, maibé ha'u hamnasa de'it. Ha'u atu dehan de'it katak, ha'u seidauk suspeitu no laiha ema ida haruka karta mai ha'u hodi husu atu ba iha CAC hodi fo informasaun ruma no derpente sira mosu dehan lori mandadu tribunal, tanba ne'e ha'u hanesan membru governu, ha'u hakfodak," dehan nia iha Edifisiu Ajensia Tatoli, Farol, tersa (18/10).

Tanba, tuir loloos palasiu governu iha nia regra rasik, ne'ebe presiza CAC hato'o mos informasaun ba Primeiru Ministru, Taur Matan Ruak antes ba hala'o buska ba membru governu.

Maske nune’e, Ministru Jerónimo prontu responsabiliza ba aktu saida de'it ne'ebe mosu iha ninia mandatu no husu públiku, bainhira haree informasaun sira hanesan ne'e, presiza buka tuir lai hodi kompleta refrensia seluk, atu bele hatene motivu.

"Tanba ne'e, ha'u husu CAC atu hadi'a nia servisu, karik hanesan ne'e hela de'it mak ba futuru sei halo moe nasaun ida ne'e, tanba nia hatun dignidade iha publiku,” dehan Ministru Jeronimo.

Tanba, ko'alia kona-ba abuzu poder, brankamentu kapital, partisipasaun ekonómia, konflitu intrese ne'e presiza haree didi'ak lai, husu informasaun ba malu.

Aleinde, iha prosesu buska no aprensaun ne'e rasik, CAC sita mos telefone (android) ho pasaporte husi Ministru Jeronimo.

Prezidente Komisaun A trata asuntu konstituisional no justisa, Deputadu Joaquim dos Santos mós hatete, CAC bele halo busk aba kualker sidadaun bainhira la koopera notifikasaun husi orgaun judisiáriu dala tolu tuituir malu.

"Bolu to'o dala tolu maka la ba, hafoin orgaun judisiariu sira uza ona regra hodi halo buskas no laiha lei atu impede orgaun judisiariu sira halo buskas ba sidadaun sira, tanba ne'e orden Tribunal, no buska iha fatin ne'ebe de'it," dehan nia.

Bainhira hetan ona notifikasaun duni, entaun lalika halo defeza ses husi prosesu, maibé tama iha prosesu nia laran, atu ba aprezenta nia pozisaun.

Tanba, pedidu ne'ebe orgaun judisiaru husu ne'e, lori estadu no povu nia naran, tanba ne'e iha konstituisaun hatur ona katak, orgaun ne'ebe aas liu atu foti dezisaun mak, orgaun judisiariu.

Maibé, Diretor Jerál Investigasaun Komisaun Anti Korupsaun (CAC), José de Araujo hatete, prosesu halo buska no apreensaun ne'ebé CAC aplika ba iha Gabinete MAPKomS ne'e, bazeia ba mandadu husi Tribunál nian.

"Agora liga ho prosesu ida-ne'e, ha'u hanoin señor ministru hatene loloos ninia estatutu oinsá, tanba saida mak CAC halo ne'e, ezekuta de'it mandadu Tribunal nian, hala'o ezekusaun mandadu tribunal nian ne'ebé haruka ami tenke halo buska, revista e apreensaun, ne'ebé iha mandadu ninia laran ne'e sita mos klaru katak, halo buska, revista no aprensaun ba suspeitu," nia akresenta

Husi ezekusaun mandadu ida-ne'e parte CAC la halo komunikasun ho Primeiru Ministru, Taur Matan Ruak, tanba mandadu buska no aprensaun ne'e ba Gabinete MAPKomS no la'os ba palasiu governu.

Tanba, mandadu tribunal nian ne'e, mos entrega ona kopia ba Ministru Asuntu Parlamentar no Komunikasaun Sosial (MAPKOMS), Francisco Jerónimo, no dalaruma nia lee no hatene ona ninia estatutu iha mandadu laran ne'e oinsá.

"Señor ministru rasik hetan, ne'ebé iha mandadu laran ne'e klaru, e ha'u hanoin katak, señor ministru mos le didiak mandadu iha laran tau klaru ona ninia estatutu," nia afirma

Liga ba mandadu ne'e rasik, media sira mos haree no hatene estetmentu husi juis administradór Munisípiu Dili nian katak, ezekusaun mandadu tribunal ninian ne'e la haree ba nia sé no fatin iha ne'ebé, maibé importante ezekuta buat ne'ebe sita iha mandadu laran.

Tanba, CAC haree iha mandadu laran mos hatete, bele ba halo buska iha edifísiu no rejidénsia ida ne'ebé deskonfia dokumentu rai ba.

Nune’e, dadaun CAC mos sita pasaporte Ministru Asuntu Parlamentar no Komunikasaun Sosial (MAPKomS), Francisco Jeronimo nian, tanba parte investigador sira haree katak, pasaporte mos liga ho suspeitu nia identidade.

"Sim, ida-ne'e kuandu ita halo ezekusaun ba mandadu, ita haree de'it saida mak kait ho ema no bele liga ho prosesu ida-ne'e, ita bele halo apreensaun (tahan) atu halo saida, dalaruma liga ho pasaporte atu evita ema ne'e, labele halai ses husi prosesu, entaun tenke sita pasaporte," afirma nia. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« November 2022 »
Mon Tue Wed Thu Fri Sat Sun
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30        

Tempo Timor Networks

Online Counter