“Projetu Dekretu-lei ne’e ho objetivu atu realiza reajustamentu iha estrutura organizasionál vijente, nune’e mós iha kompeténsia sira ne’ebé rekoñese ba órgaun RAEOA nian, atu haforsa relevánsia Rejiaun no atu fó fleksibilidade ne’ebé boot liután ba ninia jestaun, nune’e mós promove efisiénsia administrativa husi estrutura orgánika Rejiaun nian, ne’ebé permite ba Administrasaun Públika rejionál hodi fó métodu ne’ebé efisiénte liuba satisfasaun nesesidade bázika sira populasaun rejionál nian, hodi bele korrije asimetria rejionál sira”, dehan Ministru Prezidénsia Konsellu Ministru (MPKM), Fidelis Leite Magalhães iha Palásiu Governu, kuarta (05/10).
Atu hasoru difikuldade transferénsia ka destakamentu pesoál ne’ebé kualifikadu ba RAEOA, diploma ida-ne’e prevee mós atribuisaun suplementu remuneratóriu ida ba funsionáriu públiku sira transferidu sira ka destakadu tuir nesesidade servisu ba Rejiaun, devidamente justifika no autoriza husi Prezidente Autoridade RAEOA.
Nune'e mós atu garante klareza boot ba enkuadramentu ne’ebé konfere ba ZEESM-TL no sistematiza di’ak ninia dispozisaun normativa sira, introdúz Kapítulu VI foun ida, ho epígrafe “Zona Espesiál Ekonomia Merkadu Oekussi Ambenu no Ataúru nian”. (*)