Diretora Fundasaun Alola, Maria Imakulada Guterres hatete, tuir dadus nasionál ne'ebé mak sira asesu, labarik feto estudante sira iha idade produtivu kuaze pursentu 34 iha eskola teritóriu Timor laran mak hasoru violénsia iha eskola.

“Tuir dados ne'ebe iha ita haree katak ne'e kazu ida ne'ebé boot tebes, no motiva ami oinsá kria programa sira hodi hapara violasaun hasoru labarik feto sira iha eskola nune'e mós iha sosiadade”, dehan Maria, iha edifísiu Fundasaun Alola, sesta (10/06).

Tanba ne'e, Fundasau Alola servisu hamutuk ho Ministériu Edukasaun Juventude no Desporto (MEJD) implementa programa halo ligasaun, respeitu no parentalidade ba eskola iha munisípiu Bobonaro, Ermera, no Vikeké hanesan programa pilotu ida ba prevensaun violénsia hasoru feto no labarik iha eskola no sosiadade.

“Husi programa ne'ebé ita implementa fó hanoin mós ba profesór nune’e bele hanorin estudante feto no mane sira iha eskola oinsá atubele respeita malu, nune'e labele akontese violénsia sexuál no fizika iha eskola”, deklara nia.

Husi programa ne'e mós hanorin profesór sira oinsá atu ambiente eskola nian sensivel ba jeneru.

Diretór Edukasaun Munisípiu Vikeké, Emidio Amaral hatete, violénsia ne'ebé akontese iha eskola ikus ne'e menus ona tanba Ministériu Edukasaun Juventude no Desporto (MEJD) implementa ona polítika zero toleránsia hodi fó sansaun ba profesór sira ne'ebé pratika violénsia.

“Profesór ne'ebé mak halo violénsia fiziku tantu sexual, Governu tenke hasai kedan nian husi profesór bazeia ba implementasaun politika zero toleránsia”, hatete nia.

Maibé liga ba violénsia hasoru feto no labarik implementasaun programa ne'ebé Fundasaun Alola iha ne'e importante tebes oinsá estudante mane sira bele hatene respeitu estudante feto sira iha eskola.

“Feto ne'e nu’udar ita-nia inan ne'ebé hahoris ita tanba tenke respeita liliu ba mane sira”, afirma nia.

Haree ba violénsia ne’ebé mosu iha munisípiu Vikeké kuaze tinan haat nia laran ona la rejista kazu refere.

“Ita bele konsidera katak profesór sira iha ona konsiénsia hodi hapara violénsia iha eskola”, afirma nia. (*)