Liga ba situasaun ne’e, negosiante Marciana dos Santos dehan, tanba moras Covid-19, mak vendedór iha merkadu munisípiu Ermera nia produtu lokál la folin.

Durante Estadu Emerjénsia no serka sanitária ne’e modo tahan ho produtu lokál sira ne'ebé iha, labele lori ba fa'an iha kapitál Dili, tanba na’i-ulun sira taka hela dalan.

"Ha’u husu ba ukun na'in sira, ukun ita-nia nasaun tenke ukun ho lolos labele hodi de’it corona atu hamate ami ne'ebé nu’udar vendedór, tanba ami-nia oan sira eskola hotu ami tenke fa'an nune'e selu eskola no ami uza ba han lorloron nian, se ukun na’in halimar ho ami povu mak eleisaun agora ami sei la vota tan ona, maske ami povu hili tiha sira ba ukun tiha depois nunka tau matan mai povu kbi'it laek sira”, dehan nia ba www.tempotimor.com iha Merkadu Ermera vila, tersa (06/04).

Negosiante ne’e mós dehan, ukun na’in dadaun ne’e buka de’it mak sira-nia kabun, maibé la haree ba povu nia preokupasaun.

“Ukun na'in sira buka de'it mak sira-nia kabun ne’ebé boot, maibé nunka hanoin povu sira, tanba ne'e husu atu loke lalais dalan iha kapital Dili nune'e ami hodi produtu lokál ba fa'an hodi sustenta ami-nia moris, maske moras refere bele iha maibé tenki kontrola maka’as la'os de'it taka dalan ba ami vendedór sira”, reforsa.

Iha fatin hanesan vendedór, Leonel Gomes katak, hanesan povu bai-bain halo tuir de'it saida mak na’i-ulun sira-nian, tanba moras corona ne'e ameasa ba mundu tomak inklui Timor-Leste, tanba ne'e agradese ba governu nia polítika bele salva povu husi moras refere.

"Maske ami-nia produtu lokál no modo tahan sira ladun folin ba mós ami nafatin fa'an tanba nu'udar vendedór kna’ar mak ne'e, tenke fa'an duni hodi sustenta moris loroloron mezmu ho rendimentu ne’ebé sufisente nafatin iha vontade atu fa'an nafatin ami-nia produtu sira”, dehan nia.

Tanba saùde ne'e importante liu, tanba saúde di’ak hanesan ne'e osan sei bele buka, maibé agradese ba governu bele salva povu husi moras ne’ebé ameasa povu tomak nia vida.

Entretantu observasaun jornalista www.tempotimor.com nian iha terenu nota katak, maske menus ba hola na’in sira, maibé negosiante sira kontinua tuur iha ida-ida nia fatin hodi hein hola na’in sira, maske sorte mak ema hola. (*)