Liga ba dezastre naturais ne'e, motorista Marcos Trindade sente triste tanba estrada iha suku Poetete nakonu ho rai no fatuk, entaun difikulta transporte husi Ermera vila ba Gleno, kapitál munisípiu Ermara.

"Senti triste tamba estrada ne’e nakonu ho fatuk no rai, nune’e ami ne’ebé iha transporte labele halo movimentu ba kapitál Gleno no estrada refere konsidera antigu ona tambá iha tempu Indonézia nian kedas. Maske dalan ne'e la'ós nasionál, maibé trasporte barak mak gosta liuhusi dalan refere, entaun postu administriavu Ermera de’it mak bele halo movimentu bainhira atu ba kapitál Gleno, tamba besik liu kompara ho estrada públiku ne’ebé iha," dehan Motorista Marcos ba www.temporimor.com iha aldeia Titputigeo, Segunda (5/4).

Komunidade ne'e mós husu ba governu, liu-liu Ministériu relevante atu tau atensaun imediatu, nune'e bele fasilita movimentu komunidade inklui transporte públiku no privadu sira.

“Tambá ne’e ha’u husu ba parte relevante no respoonsabilidade autoridade sira ne’ebé pretense ba iha árae refere tenki foti asaun imediata, nune’e bele hadi'a lalais hodi tranporte sira bele movimentu hanesan baibain, entaun husu liu-iu ba autoridade suku oinsá buka mekanizmu no apela ba komunidade sira tenki kontribui ba desenvolvimentu iha baze la'ós hein de’it husi governu,” dehan Nia.

Liga ba situasaun ne'e, xefe suku Poetete, Felisberto da Neves katak, prekupasaun ne’e ema hotu nian tamba dalan ne’e konsidera mós hanesan dalan públiku, maibé oinsá mak bele normaliza hanesan baibain ita hotu tenki iha responsabilidade nune’e tau hanoin hamutuk hodi bele hadi'a nune’e transporte sira bele movimentu.

"Maske responsabilidade ita hotu nian maibé hanesan xefe suku iha kompeténsia ba asuntu ne’e, no imforma ba parte relevante liliu Ministériu Obras Públiku munisípal bele apoiu ekipamentus ruma hanesan (eskapator) ruma nune’e bele hadi'a Estrada refere, karik lai’ha responde ruma husi parte releventa mak hanesan auridade lokál tenki apela ba komunidade sira hotu kontribui hadi'a estrada refere, nia reforsa.

Entretantu, observasaun www.tempotimor.com iha terenu nota katak, estrada refere nakonu ho rai no fatuk depois iha iha estrada klaran komesa iha loron (4/4) maibé laiha parte balu halo asaun, tamba dalan ne’e diresaun Ermera ba Gleno transposte sira labele movimentu hanesan baibain.(*)