“Iha tinan 2018 hahú Governasaun foun mai ita muda ba Sekretáriu Estadu Kooperativa mai to'o tinan 2022 e hahú hari’i Sekretáriu Estadu ne'e ema barak komesa koñese saida mak Kooperativa ne'e hahú husi Prezidente to'o ema dasa rai hatene Kooperativa siknifika katak Kooperativa iha prezensa ne'e iha duni”, dehan Diretór Reinaldo Borges ba www.tempotimor.com iha nia kna’ar fatin Bairopité, segunda (21/02).

Iha tinan 2.000 mai Kooperativa sira iha Timor laran tomak iha de'it 26, ne'ebé kontinua husi tempu Indonézia nian, hafoin ezisténsia SEKOOP ema barak mak hatene katak prezensa Kooperativa iha Timor-Leste.

Hafoin ezisténsia SEKOOP konsege hala'o formasaun ba Formadór no Prezidente Kooperativa sira inklui grupu sira ne'ebé mak iha vontade hakarak hari’i Kooperativa sira.

“Prosesamentu ne'ebé ami la'o formasaun ne'ebé ami la'o no proposta sira ne'ebé ami simu ne'e mesak inisiativa husi kada komunidade sira ne'ebé mai husi ema agrikultór sira mós iha, komunidade enjeral mós iha komunidade Akadémika sira mós iha no agora dadaun ne'e Ministériu balun mós hakarak hari’i Kooperativa rasik, ezemplu iha UNTL ne'e Kooperativa iha, no iha SEFOPE mós sei iha tan formasaun ba sira”, afirma nia.

Governu la kria Kooperativa maibé fasilita de'it ba komunidade ka grupu ruma ne'ebé mak iha vontade hakarak hari’i Kooperativa nune'e SEKOOP fasilita sistema sira.

Dadaun ne'e Kooperativa Kréditu Uniaun ne'e sa'e ba atusida-resin ne'ebé balun foin hahú la'o no balun uza ona sistema sira ne’ebé estabele.

“Iha formasaun Kréditu uluk iha 93 maibé agora ne'e sa'e 125 maske balun foin hahú, balun seidauk la'o di'ak balun la'o di'ak ona, balun la'o uza ho sistema ona”, akresenta nia. (*)