Diretór SEFOPE Baukau, Romualdo António de Souza hatete, sira liu ona selesaun dokumentus, tanba ne'e kontinua teste eskrita ba tuir formasaun laboratorium Agrikultura iha Sentru Dezenvolvimentu Komunitáriu (CDC-sigla portugues) Triloka Baukau molok ba servisu iha rai liur.
"Ohin hahú teste eskrita ba ita nia joven sira ne'ebé pasa ba selesaun dokumentus, sira pasa ne'e iha 85, sira ne'ebé pasa sei kontinua ba tuir formasaun iha CDC área Agrikultura nian," dehan Romualdo iha nia kna'ar fatin, kinta (17/02).
Tanba, servisu iha Australia, traballadór sira tenke liuhusi formasaun agrikultura ne'ebé akreditadu.
Staf Administrasaun Diresaun Nasionál Empregu Exterior, Agostinho Maria hatete, materia ne'ebé fó teste ba traballadór sira ne’e, liga ba servisu iha Australia liliu área hortikultura.
"Teste ida ne'e ba segundu faze, primeiru faze ba pilotu ne'e, iha Munisípiu Likisa, agora segundu faze nian mak ba Kovalima ho Baukau, teste ne'e ligadu ba rekizitus mak mai husi emregador iha ne'eba kona-ba Agrikultura saidá mak prezisa iha Australia karik, ida ne'e mak ami mai fó teste ba sira," nia hatete
Reprezentante kandidatu traballadór, Eduardo Gregorio Belo sente kontente, tanba liu selesaun dokumentus hanesan previleziu hodi partisipa fali iha teste eskrita.
"Ida ne'e hanesan oportunidade ida ne'ebé ha'u sente kontente, espera teste eskrita ha'u bele liu prontu tuir formasaun ne'ebé diresaun nasionál exterior koloka ona mai ami," nia hatete
Enkuantu teste eskrita ne'e remata kandidatu traballadór sira ne'ebé liu sei hala'o formasaun durante semana 3 iha sentru formasaun CDC Triloka, ne’ebé sei hahú iha loron 23 fulan-fevreiru to'o marsu tinan 2022. (*)
