Prezidente BTL,EP, Carlos Peloi dos Reis hatete, asina kontratu ho kompaña rua ne'ebé manán projetu konkursu públiku fornesimentu Bee-moos iha suku Mehara.
“Ohin ita asina akordu ho kompaña rua, Fuente de Exito JV ho Acelda Unit. Ita asina kontratu ida para sira bele fornese bee-moos ba populasaun suku Mehara ne'ebá populasaun kuaze 2000 mil itál, ho xefe família kuaze 450 pesoál”, informa Carlos, iha fatin edifísiu BTL,EP, Kaikoli, kinta (17/02).
Durante ne'e komunidade susar atu asesu bee-moos, tanba ne’e Bee Timor-Leste esforsu iha tinan 2021, halo ona levantamentu dadus populasaun, no halo hotu dezeñu Bill of Quantity (BOQ), ne’ebé konsege konklui ona no kompaña Fuente de exito JV no Acelda unit mak manán projetu refere.
“Ohin selebra kontratu ba projetu refere ho durasaun fula neen, tempu badak nian laran sira bele hahú implementa projetu ba meloramentu sistema fornesementu bee-moos ba komunidade suku Mehara”, afirma nia.
Husi tinan 2022 ba oin servisu la hanesan ho tinan kotuk liu ba, tanba ne’e Kompaña sira tenke mantein servisu tuir kontratu ne'ebé ihá, no BOQ ne'ebé preparadu ona.
“Karik iha mudansa ba implementasaun sira tenke informa antes ba ekipa tékniku BTL,EP, para ami aprova uluk foin kompaña bele muda, no sira la bele halo tuir nia hanoin”, esplika nia.
Bainhira kompaña la halo tuir akordu ho BOQ ne'ebé establese ne'e, BTL iha direitu atu fó penalidade ba kompña sira.
Ba projetu fornesimentu Bee-moos iha suku Mehara iha orsamentu ne'ebé alokadu ho hamutuk rihun-347-resin.
Diretór Fuente de Exito, Angelo da Silva hatete, asina kontratu ne'e halo ba projetu melloramentu sistema fornesementu bee-moos iha Suku Mehara.
“Asina kontratu ne'ebé iha atu orienta ami atu ezekuta obra ida ne'e to'o fulan neen, ne'ebé ami husi kompaña rua ida husi kompaña Fuente de Exito no ida seluk mak Acelda Unit Unipesoal Lda, ami prontu exekuta orientasaun husi Bee Timor-Leste”, dehan nia.
Kompaña Fuente de Exitu hamutuk ho Acelda Unit Unipesoal Lda, prontu ona atu implementa projetu Bee-moos iha loron 22 fevereiru 2022 tuir kontratu. (*)
