Login to your account

Username *
Password *
Remember Me

PR Lú Olo Deklara Investimentu Importante Kuida Ambiente 

Prezidente Repúblika (PR), Francisco Guterres 'Lú Olo', fahe hela ai-oan ba Administradór munisípiu 12 inklui RAEOA iha Munisípiu Likisá, Suku Lauhata área Pilila, sábadu (18/12). Prezidente Repúblika (PR), Francisco Guterres 'Lú Olo', fahe hela ai-oan ba Administradór munisípiu 12 inklui RAEOA iha Munisípiu Likisá, Suku Lauhata área Pilila, sábadu (18/12). Foto Suplay

Tempotimor (Likisá)-Prezidente Repúblika (PR), Francisco Guterree 'Lú Olo' deklara, investimentu importante iha Timor-Leste mak sidadaun hotu tenke kuida ambiente.

"Fahe ai-oan ida hodi hatudu, ba ita-nia oan katak, investimentu importante liu mak kuidadu ita-nia ambiente. Ha'u hatene katak iha ha'u-nia vizita ba munisípiu sira entrega mós ho programa kuda no fahe ai-oan ", dehan PR Lú Olo iha Lauhata, sábadu (18/12).

Tanba ne’e, haksolok hamutuk ho Governu hodi entrega ai-oan ba Adminitradór munisípiu 12 inklui RAEOA, no simbolikamente kuda ai-oan iha munisípiu Likisá, Postu Administrativu Bazartete, Suku Lauhata, Aldea Fixu Kraik, Area Pilila.

"Prezidente Repúblika ho haksolok mai hamutuk ho VIII Governu ohin, reprezenta husi Ministru Konsellu Ministru no Sekretáriu Estadu sira, deputadu sira, korpu diplomátika sira, prezidente autoridade Munisipál no administradór, RAEOA, veteranu sira, sosiedade sivíl, komisaun relijioza ho komunidade sira, hodi entraga ai-oan no kuda simbolikamente iha fatin ida ne'e duni Lauhata, Pilila", afirma nia.

Programa kuda ai-oan no entrega ai-oan, nu'udar kontinuasuan programa kampaña sidadaun ida, ai-oan ida, ne'ebé Prezidante Repúblika rasik lansa ona iha janeiru tinan 2019.

"Programa ohin dader mós realiza, tanba ha'u-nia kumprimisiu polítiku hodi kuda ai-oan tokon 1 durante ha'u-nia mandatu", hatete nia.

Programa ida ne'e nu'udar atu simboliku kampaña ai-oan tokon 1 ba munisípiu sira, no hala'o iha ámbitu komemorasaun loron nasionál floresta ne'ebé monu iha loron 13 fulan-janeiru tinatinan, ho rezolusaun Governu númeru 11/2017 de 27 fevereiru.

"Ohin Prezidente Repúblika, ha'u rasik hamutuk ho membru VIII Governu konstituisional sei entrega  ai-oan iha munisípiu 12 inklui RAEOA, no husu partisipasaun ativa husi Prezidente munisípiu, administradór sira atu kontinua sosializa akompaña sidadaun ida, ai-oan ida, no fó motivasaun hodi implementa kuda ai-oan ida-idak, iha ninia Munisípiu ka nia fatin", dehan nia.

Antes ne'e programa kampaña sidadaun ida, ai-oan ida, iha loron 1 fulan-juñu 2019 Prezidente rasik fahe ai oan konsumu hanesan, marungi, sabraka, has no seluktán hamutuk ai oan 200 ba labarik, hodi komemora loron labarik sira-nian.

Vise Ministru Agrikultuta no Peskas (MAP), Abílio Xavier de Araújo hato'o parabéns ba Prezidente Repúblika ho nia espoza, ne'ebé bele marka istoria foun iha Likisá, tanba alende rona dezafiu husi komunidade durante tinan hirak liu ba kotuk, maibé ohin bele dezenvolve diresaun florestas no servisu lubuk ida ne'ebé fornese ai-horis ba sidadaun sira.

"Ha’u hanoin situasaun ida ne'e situasaun ida ne'ebé foun, ba ita-nia nasaun Timor-Leste e pela primeira vez mós iha Prezidente Repúblika Demokrátika Timor-Leste foin ohin ita-nia Prezidente marka istória foun ida ne'e", hatete nia.

Administradór Postu Administrativu Bazartete, João Nascimento Braz, orgullu tanba Prezidente Repúblika bele mai hamutuk ho komunidade tomak Suku Lauhata kuda ai-oan simbolikamente iha área Pilila, atu hatudu ba komunidade no sosiedade tomak katak importante tebes, sidadaun ida, ai-oan ida, hodi proteze no konserva nafatin ambiente ba futuru jerasaun foun sira nian.

“Ha'u espera katak asaun Prezidente nian ne’e bele konvense ema hotu kuda ai-oan iha sira-nia horik fatin", dehan nia.

Tanba ne'e, ema hotu iha obrigasaun atu kontribui hodi hadia hikas mudansa klimatika ne’ebé iha ho asaun konkreta liuhusi kuda ai-oan, no husu atu komunidade sira tenke reduz tesi ai ba fa’an tanba bele lori risku ba ema hotu.

“Se ita tesi ai bebeik ita-nia oan no beioan sira sei terus iha futuru”, deklara nia. (*)

Rate this item
(0 votes)
Last modified on Saturday, 18 December 2021 17:14
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« August 2022 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

Tempo Timor Networks

Online Counter