"Ita-nia preparasaun liga host ka mangeira ne'e atinje ona pursentu 75 hanesan ne'e tanba, hein hela hamoos de'it tanba sasán ne'e kleur ona ne'ebé tenke hamoos filafali, no tanba Covid-19 taka dalan ne'e kleur oituan ne'e”, dehan Pak Putu ba www.tempotimor.com iha Betanu, kuarta (17/11).

Bainhira preparasaun instalasaun remata sei kontinua prosesu Suplay mina tanba dadaun ne'e operadór ba Mangera mak atinje ona pursentu 75.

"Maibé ita sei koko nia kondisaun sira di'ak ka lae?. Atu nune'e bainhira Ró sira tula mina mai ne'e di'ak”, afirma nia.

Antes ne'e Diretór Nasionál Produsaun de Enerjia Eletrika, Paulino Amaral Da Costa, fó ona xamada ba Prezidente Konsellu Administrasaun Kompaña SACOM energia Lda, Abilio da Conceição Abrantes de Araújo, atu ho boa fé hodi hatama mina balansu husi kontratu ba Sentrál Betanu.

"Atu pasa informasaun ba públiku liuhusi mídia tuir prosedimentu diresaun jerál EDTL ninian diretór jerál mak bele pasa informasaun. Maibé iha loron ida ne'e komu diretór jeral okupadu, entaun permite fó autorizasaun ba diresaun nasionál de produsaun elektrika atu pasa informasaun, tanba ida ne'e mak ohin hau simu autorizasaun ne'ebé permite ha’u atu pasa informasaun ba publiku”, dehan Paulino Amaral da Costa.

Diretór ne'e fó xamada tanba, kompaña hatama mina la kumpre montante ka kuantidade ne’ebé estabelese iha akordu tuir kontratu fornesimentu mina ba sentru eletrika Betanu.

Diretór ne'e fó informasaun ba públiku katak, mina ne'ebé durante kompaña SACOM fornese ba sentru betanu bazeia ba kontratu ASD númeru 013/MOP/2019, ne'ebe ho kuantidade millaun 50.122, 829,67 litru, ne’ebé nia kontratu asina husi kompaña SACOM ho Governu. (*)