"Lolos ne'e eis Ministru tenke moe, tanba uluk nia ukun nia la konsege agora nia ko'alia fali, ne'e ema ida ne'ebé gosta so'e fatuk subar liman ne'e mak ne'e", dehan nia iha Palásiu Prezidente Bairopite, segunda (25/10).

Lolos Eis Ministru mak tenke apoiu, agora uluk ukun iha primeiru Governu to'o mai produsaun oinsá,  produsaun menus ne'e realidade duni la presiza nia ko'alia mós menus.

"Maibé tenke konsidera ida ne'e haree husi nia pozitivu katak, ne'e insentiva oportunidade merkadu ne'ebé iha ona dudu ita-nia agrokultót sira atu hasa'e produsaun, ne'ebé ba ha'u, Estanislao nia deklarasaun ne'e hanesan deklarasaun ida soe fatuk subar liman", afirma nia.

Agora produsaun laiha tanba uluk nia la halo esforsu masímu, se nia halo esforsu masímu, nia investe maka’as fó subsidiu ba agrokultór sira karik, oras ne'e produsaun iha.

"Rezultadu ida agora ne'e rezultadu Estanislao nia ukun ne'e mak nia rezultadu agora ne'e, ne'ebé nia deklarasaun ne'e hatudu katak, nia soe fatuk subar liman, nomós ita dezafia fali nia deklarasaun katak, husu komunidade fornesementu hahán husi Governu ba funsionáriu públiku konsidera ida ne'e hanesan potensia merkadu, posibilidade dudu hasa'e produsaun", dehan nia.

Antes ne'e, Eis Ministru Agrikultura no Peskas, Estanislao da Silva, hanesan mós Assesor ba Ministru Koordenadór Asuntu Ekonomiku hatete, nia  parte haree Politika Governu nian ne'ebé introduz Funsionáriu sira sei hetan ai-hán kada fulan, mais haree produsaun rai laran hanesan ne'ebé?. 

Maibé nia parte sei dúvida oituan ho produsaun sufisienta atu fó ba funsionáriu sira, politika di'ak maibé agora dadauk haree katak produsaun hanesan hare de’it sei menus.

“Ita produz mais ha'u iha dúvida oitoan se ita-nia produsaun sufisiente atu tinan tomak ne'e atu fó ba funsionáriu sira hotu, ha'u hanoin sei ultiliza mós importasaun balun, atu produtu nasionál de’it sei labele kobre to'o, liliu ita-nia produsaun hare ne'e seidauk barak liu”, dehan nia hafoin halo sensibilizasaun konsultasaun públiku adezaun Timor-Leste ba Organizasaun Mundial Komersiu, iha Salaun Novu Turizmu, sesta (22/10).

Enkuantu subsídiu mensal ne'ebé Governu kria ba funsionáriu públiku kada fulan sira sei simu fós kilógrama 35 (35kg) inklui ai-hán seluk tan, ho objetivu permite hamenus despeza ho akizisaun ba ai-hán sira no konfesaun refeisaun sira. (*)