Deputadu FRETILIN, Alexandrino Cardoso da Cruz hatete, bazeia ba vizita no fiskalizasaun ne'ebé hala'o ba Munisípiu Ainaro, agrikultór Suku Kasa, hato'o lamentasaun kona-bá kompaña sira hasa'e folin produtu lokál iha prosesu distribuisaun.
"Tanba sira haree bainhira sira simu sesta bázika, batar u’ut, kilograma ida de'it, folin US$1.50, fós kilograma-lima de'it, ho folin US$8.50 maibé kompaña sira ba sosa iha sira, hare kulit kilograma-ida US$ 0.40 sentavu, no batar kilograma-ida US$0.30 sentavus ida ne'e lamentável", dehan nia iha plenáriu PN, segunda (4/10).
Husu ba Governu sé bele buka no hadi'a prosesu ida ne'e, nune'e povu agrikultór sira mós bele satesfas.
Dadauk komunidade iha aldeia Mausuka Bee-Moris, hamutuk ho reklamante sira iha Suku Kasa, Postu Administrativu Ainaro hamutuk atus-785 mak rejeita simu sesta bázika tanba kompaña sira manipula folin sasán ne'ebé tuir loloos nia folin la to'o ida ne'e.
"Sira dehan oitavu Governu nia programa ne'e di'ak tanba bele fó moris ba povu, maibé sira sente triste mak kustu husi sesta bázika ne'e la atinje to'o númeru ida ne'ebé mak Parlamentu Nasionál aprova pois Prezidente Repúblika promulga”, esplika nia.
Ba programa sesta bázika ne'e, item lubuk ida mak komunidade sira soma hamutuk nia folin, konsege hetan de'it valór US$10, maibe la'ós US$50.
“Maibé sira husu mak ne'e, ami la ejize barak, tanba hanesan sidadaun ami mós iha diretu, ami rejeita ida ne'e la'ós la konkorda maibé ami tristi ho ninia kustu ne'e. Tanba ne'e husu ba Ministériu sira ne'ebé mak responsável, no ema ne'ebé mak sai hanesan responsável ba distribuidór ba sesta bázika ne'e, sira-nia komprensaun ne'e oinsá mak ema lubuk oan ida ne'e bele hetan hias sira-nia diretu”, dehan nia. (*)