"Tipu atividade sira ne'ebé hala'o ona iha primeiru trimestre mak hanesan, halo ona sensibilizasaun kooperativa iha fatin (8), formasaun báziku kooperativa hamutuk (7), semináriu ba dirijente sira kooperativa nian (1), hala'o selesaun ba formadór, halo auditória (1), akompañamentu AGM (1), halo despedida ba estajiadu sira iha fatin (1), no atividade saluk mak, prepara ona assembleia extra-ordinária ida (1)", informa Diretór Diresaun Nasionál ba Dezenvolvimentu iha Setór Kooperativa (DNDSK), Reinaldo Borges, ba www.tempotimor.com iha kna'ar fatin, Federasaun Hanai Malu (FHM), iha Lanud-Bairro Pité, segunda (06/09).

Tuir indikasaun iha tabela ne'ebé www.tempotimor asesu katak, atividade sensibilizasaun kooperativa, hala'o iha Suku Goulolo, Postu Administrativu Letefoho, Munisípiu Ermera, ho totál partisipante hamutuk na'in-235 (feto 111 no mane 124).

Iha Munisípiu Vikeké, hala'o iha Postu Administrativu Ossu, Suku Osurua, Uabubu, Loihunu (Credito Uniăo Chiber), iha Postu administrativu Lakluta, hala'o iha Suku Uma-tolu (Credito Uniăo Sabiruk Kmanek), Suku Ahik (Credito Uniăo Hametin), Postu Administrativu Uatulari, iha Suku Uma-wain Leten, Lugasa (Credito Uniăo RIBERS), Postu Administrativu Vikeké Villa, hala'o iha Suku Uma-Wain Kraik (Credito Uniăo CCTM), ho partisipante hamutuk na'in-426 (mane 213 no feto 213).

Iha formasaun bázika kona-ba kooperativa nian, hala'o iha Munisípiu Dili (Bairopite), Vikeké iha Osurua (Credito Uniăo HAFA), Suku Ahik (Credito Uniăo Hametin), Suku Uabubu (Credito Uniăo KUSU), Suku Loihunu (Credito Uniăo Chiber), Suku Uma Wain Leten (CU Ribers), no Suku Uma-tolu (CU Sabiruk Kmanek), ho totál partisipante sira hamutuk hotu iha, 192 (mane 100 no feto 92).

Ba selesaun ba formadór, SEKoop hala'o bazeia ba padraun sira ne'ebé estabelese husi Institutu Nasionál ba Dezenvolvimentu Maun-de-Obra (INDMO), iha Munisípiu Dili, Postu Administrativu Dom Aleixo, Suku Bairopite, ho partisipante hamutuk na'in-70, husi mane 34 no feto iha 35.

SEKoop mós hala'o formasaun ba dirijente kooperativa sira hotu iha Timor-Leste, hamutuk ema 113, kompostu husi mane 83 no feto iha 30.

Iha parte auditória nian, hala'o iha Munisípiu Baukau, Postu Administrativu Baukau Villa, Suku Kaibada, iha Credito Uniăo (CU) Fini Naroman Caibada, no Munisípiu Ainaru, iha Postu Administrativu Maubisse, iha Kooperativa Produsaun Cocamau Maubisse, ho atividade preparasaun ba akontabilidade no organiza asembleia extra-ordinária ida.

Atividade hirak ne'e, nu'udár ezekusaun programa husi diresaun nasionál ba dezenvolvimentu iha setór kooperativa nian, kompostu husi sensibilizasaun, formasaun bázika, formasaun espesiálidade, no halo akompañamentu ba grupu kooperativa sira iha territóriu laran.

"Ho objetivu atu fahe informasaun ba komunidade kona-ba lala'ok kooperativa nian iha Timor-Leste, hodi apoiu jestaun ne'ebé di'ak no loos tuie padraun kooperativa ne'ebé iha, atu nune'e komunidade sira bele envolve, hala'o, no dezenvolve atividade kooperativa, nian ho di'ak, loos, hodi bele aumenta kresimentu ekonómia komunidade sira-nian iha baze liuhusi atividade kooperativa", esplika Reinaldo.

Tuir dekretu lei númeru 138/16/2004, fó dalan atu haburas no dezenvolve setór ekonómia baze sai forti no metin liután hodi kria kampu traballu ba komunidade sira. (*)