"Departamentu tránzitu seguransa rodaviária nasionál, hakarak relata de'it dadus husi tránzitu iha territóriu nasionál hatama osan ba kofre estadu, hamutuk UU$.30,279 dollár, iha fulan-Agostu nian", informa Xefe Departamentu Tránzitu no Seguransa Rodaviária Nasional, Superintendente João Belo dos Reis, iha Kuartel Jerál PNTL, Kaikoli, tersa (07/09).
Nune'e mós, totál reseita husi sirkulasaun transporte estranjeiru sira ne'ebé mak tama iha territóriu Timor-Leste nian, hamutuk US$8,514.
"Ida ne'e hatama husi parte Mota-ain, nomós Mota-masin. Ita nia postu tránzitu destaka iha ne'ebá, entaun, transporte estranjeiru ne'ebé mak tama, ita autoriza sira tama, depois ita kobra osan iha ne'ebá, hamutuk US$8,514", dehan nia.
Portavóz Komandu Jerál PNTL, Superintendente Polisia, Arnaldo de Araújo hatete, tuir dadus jerál kona-ba insidente ne'ebé mosu iha Timor-Leste hamutuk kazu 14, ho tipu lahanesan.
"Hakarak hato'o de'it katak, kazu insidente ne'ebé mak hahú mosu to'o iha dia 07 de Setembru 2021, insidente hamutuk 14 kazu, ho nia kazu oioin hanesan, asaltu malu na'in-7, abuzu seksuál ba labarik minoridade na'in-2, ahi-hán uma 2, tara-an 1, transasaun sasán ilegál 2, ne'e mak akontese iha ita-nia territóriu Timor-Leste laran tomak durante semana ida ne'e nia laran", dehan Arnaldo. (*)
