“Ita presiza tetu filafali polítika sinterklas no ema husu ka hatama proposta ita fó apoiu. Proposta ita hatán mas oinsá se programa di’ak bele opta sai hanesan programa Ministériu nian. Movimentu ne’e ema labele dehan, la’ós Governu mak bele halo movimentu. Tanbasá mak Governu mós labele halo movimentu ne’e?. Ha’u hakarak dudu ba Governu, ba Ministériu sira, para oinsá movimentu husi grupu sira hanesan agrobusiness (agronegósiu) ho tan sira seluk, peska, por ezemplu, ita komesa identifika atu sai hanesan programa iha munisípiu”, dehan nia hafoin vizita fatin haki’ak modo husi grupu produtivu, Movimentu Agrikultura Progresivu, tersa (17/08).
Maibé, Governu, liuhusi liña ministerial sira, presiza tetu filafali maneira aproximasaun no apoiu ne’ebé fó ba grupu produtivu sira ne’ebé husu Governu nia apoiu hodi sustenta sira-nia atividade.
Bainhira nia sai Programa Munisípiu, nia hanesan anexu ida programa munisípiu ne’e tomak. Bainhira to’o nível nasionál, hanesan anexu ida Programa Nasionál ba agrikultura.
“Programa di’ak, hanoin di’ak, tenke integra iha planu Governu, para halo mobilizasaun ida maka’as tebes atu halo dezenvolvimentu ba ita-nia povu”, afirma nia.
Koordenadór Movimentu Agrikultura Progresivu (MAP), Inácio da Cruz haktuir, Grupu ida ne’e hari’i husi lisensiadu no estudante sira husi área agrikultura ne’ebé halibur mós joven sira ne’ebé la kontinua eskola hodi kuda modo oioin ba agronegósiu hanesan: mostarda, modo-mutin, repollu, alfase, tomate no seluktan.
“Ami hahú husi zero. Ami estabelese grupu ne’e ho fundus inísiu US$ 100 ne’ebé ami devé husi ami-ninia Prezidente Konsellu Nasionál Joventude Timor-Leste (CNJTL) Ainaro no to’o agora seidauk selu”, dehan nia.
Maibé sira presiza uza de’it enxada mak fila rai no rega modo hirak ne’e ho liman de’it. Tanba sira-nia ema la to’o sira husik kanteiru 25. Tanba uza gembor (Bee fatin hodi rega modo) fila ba mai bele tama to’o iha Aileu.
“Ami mós hato’o ona ba Ministériu Agrikultura no Peska, maibé seidauk hetan resposta, atu apoiu Tratór-liman Tiller, tratór ki’ikoan hodi harahun, kahur rai no halo bedengan (kanteiru), molok kuda modo”, informa nia. (*)
