Tempotimor (Dili) – Jape Kong Su preokupa maka'as folin bilete aviaun karun, nune'e huau ona ba Primeiru – Ministru, Taur Matan Ruak atu governu bele apoiu no fasilita nia hodi bele hatama tan aviaun foun ida bele halo kompetisaun, nune’e bele afeta ba hatun folin bilete no mós bele fasilia movimentu turisa sira tama barak mai Timor – Leste. 

 

“Ohin ha’u hatan ba Primeiru – Ministru katak ha’u dehan Hera ne’e kuandu ba oin ne’e ba oin ona, maibé aviaun ne’e mak karun demais. Turista menus mai Timor, ha’u dehan estadu tenke fó autorizasaun hodi hatama tan kompañia aviasaun rua ka tolu mai Timor hodi bele kompete iha merkadoria no bele afeta ba folin bilete tun,” hatete Jape ba Jornalista sira iha Palásiu Governu, Kuarta (07/08).  

 

Jape hatete, bilete karun tanba kompañia aviasaun sira maioria hosi Indonézia, no laiha kompetisaun iha merkadu aviasaun nune'e problema refere mós fó impaktu ba prosesu konstrusaun projetu Jape ninian iha area Dolok oan no Hera. 

 

“Uluk ba Bali ho $150 ba – mai. Agora hahu hosi $500 to’o $600. Ida ne’e ema atu mai oinsa. Ha’u ba iha liur, aranja ema hosi liur, ami sosiu ho nia hodi lori aviaun foun tama Timor no bele lori turista barak mai. Turista sira ne’e sei mai hosi Australia, Bali (Indonézia), Singapura, Hong Kong, China no Japaun,” nia hatete. 

 

Jape mós garante katak nia investimenu sira iha Hera sei kontinua. 

 

“Ita hetan problema ida, maibé ne’e la’ós problema boot. Problema ki’ik ida, ema ida – rua de’it. Restu ne’e di’ak,” nia esplika. 

 

Antes ne’e General Manager Timor Plaza, Tony Jape nu’udar oan mane hosi Jape Kong Su mós deklara katak nia iha interese boot tebes atu halo investimenu iha área turizmu iha Timor – Leste, no sujere ba governu katak la persija gasta osan barak ba iha dezenvolvimentu setor turizmu, maibé presija fó atensaun maka’as hodi dezenvolve setor ne’e hosi etapa id aba etapa seluk.

 

Problema kona – bá folin bilete aviaun karun ne’e mós levanta ona hosi laureadu nobel paz 1996, José Ramos Horta no nia apoiu kompañia aviasaun ida hosi China bele tama mai Timor – Leste, no akuza kompañia aviasaun Indonézia Garuda durane ne’e monopoli hela merkadu ba transporte aviasaun iha Timor – Leste. 

 

Enretanu, Primeiru – Ministru, Taur Matan Ruak rasik mós antes ne’e husu ona ba Ministériu Transporte no Komunikasaun atu halo preparasaun lalais hodi simu kompañia aviasaun hosi China ne’e.

 

Bazeia ba informasaun promosaun ba folin billete aviaun hosi ajensia travel sira iha Dili laran katak kuaje $ 400 resin ba – mai hosi rute Dili – Denpasar (Bali).