“Ohin (09/08) sira mai aprezenta fali rezultadu ezersisiu depois de fahe pakote ba kada ajénsia sira inklui mós ajénsia autonomu sira ne'ebé mak tutela ba MOP hanesan Eletrisidade Timor-Leste (EDTL), Bee Timor-Leste (BTL), ne'ebé benefísia husi orsamentu transferénsia públikas husi MOP nian ba sira”, dehan Ministru Obras Públika (MOP), Salvadór Pires, iha Otél JL Villa, Fatuhada, segunda (09/08).

Husi totál orsamentu ne'ebé distribui ona kada pakote ne’e, EDTL ho montante orsamentu hamutuk rihun US$90, no BTL iha rihun US$16.

 “Agora, Obras Públika, Diresaun Jerál de estudu mós hanesan, fahe ba saida de'it, purezemplu diresaun abitasaun ho urbanízmu mós hanesan. Entaun, ida ohin ne'e mak ami haree fali pakote US$157 milhões, depois osan ne'e fahe ba ajénsia sira ne'e, sira aloka ba saida de'it, molok ita tama ba faze ida tuir ne'e”, esplika nia.

Planu prioridade ba EDTL nian mak, kontinua projetu ba liña distribuisaun sira, hafoin halo instalasaun ba prepagu sira atu hasa'e rendimentu, kontrolu koneksaun ilegál sira, hadi'a sistema distribuisaun liña eletrisidade nune'e, bele hamenus ahi mate.

“EDTL, ami-nia planu 90 milhõens, ne'e ba kobre hanesan kombustível sira, projetus oioin, klaru que sira mós iha hela orsamentu ne'ebé atribuidu iha tinan ne'e, sira iha balansu, sira sei lori ba tinan oin”, dehan nia.

Aleinde ne'e, EDTL mós rekolla reseita, kada tinan iha rihun US$33 no iha tinan 2021 ne'e sira halo hela akizisaun ba rihun-102 l kontadór prepagu.

“Ba BTL mós hanesan, kontinua promove projetu ba hasa'e kobertura ema asesu bee, liliu iha kapitál, munisípu, postu administrativu, tanba sira-nia área. Agora, suku sira ne'e, área rurál ne'e ba PNDS (Programa Nasionál Dezenvolvimentu Suku) nian ne'ebé tutela iha Ministériu Administrasaun Estatál (MAE)”, esplika nia. (*)