Tempotimor (Dili)-Komunidade Uma-kain hamutuk atuida-hitunolu (170) iha aldeia Heni-Huta, Suku Builale, Postu Administrativu Ossu, Munisípiu Vikeké seidauk asesu eletrisidade.
“Ami-nia suku ne'e iha aldeia ida Heni-Huta ne'e mak seidauk asesu liña eletrisidade, ne'ebé ho totál uma-kain ne'e 170 ital, entaun ne'e problema oituan ba ami-nia komúnidade atu asesu informasaun iha nível nasionál, tanba agora ne'e situasaun pandemia Covid-19 nia laran, maibé oinsá mak sira atu asesu informasaun, sera que ahi laiha, inklui dezenvolvimentu iha rai laran mós sira la asesu”, dehan Xefe Suku Builale, António Gomes Monis, liuhusi via telefone, segunda (09/08).
Maske haruka ona proposta ba parte relevante sira maibé seidauk iha resposta, tanba ne'e halo proposta foun ba Eletrisidade Timor-Leste (EDTL) no iha ona resposta katak problema eletrisidade tama ona programa governu ba tinan 2021.
Ho ida ne’e sujere ba parte relevante sira atu tau atensaun ba problema sira ne'ebé komunidade enfrenta iha baze liliu Uma-kain 170 ne'ebé la asesu liña eletrisidade, tanba komúnidade sira presiza tebes informasaun iha nível nasionál.
Suku Builale ho nia totál populasaun 2209, husi Aldeia Liaró, Betekai Ana, Kai Tara Hu'u, Heni-Huta, no Kaileti Ana. (*)
