“Ministru, ha’u hanoin ita tenke preokupa, agora tama ona bai loron. Karik bele ita halo konsensializasaun nafatin para nune'e povu bele hatene konsiente katak buat ne'e perígu ba sira, depois inundasaun ita hothotu haree iha Dili laran no Timor-Laran tomak”, dehan nia iha plenária Parlamentu Nasionál, tersa (03/08).

Tanba inundasaun ne’ebé mosu iha loron 4 fulan-abril tinan 2021 ne'e kontribui mós husi sasán ka lixu ne’ebé soe arbiru iha fatin públiku.

Nune'e iha momentu ne'eba, governu ne’ebé lidera husi Primeiru Ministru (PM), Taur Matan Ruak kria ona inisitiva hodi mobiliza instituisaun estadu, halo limpez jeral.

Ho ida ne’e, husu atu reativa hikas insiativa ne'e, tanba akua, plastiku, no kalen at sira, agora iha mota laran barak teb-tebes.

“Tanba ne'e señor Ministru se bele hola tok inisiativa atu hahú hikas halo limpeza ba Bairu-Bairu e fatin públiku ne'ebé agora foer maka’as los”, dehan nia.

Iha fatin hanesa Deputada CNRT, Maria Bisoi husu ba Governu liliu Autoridade Inspesaun no Fiskalizasaun Atividade Ekonomia, Saniotária no Alimentar (AIFAESA) atu halo kontrolu másimu ba sasán prazu iha loja liliu supermarket iha Dili laran.

“Ha’u atu ko’alia loja Xina nian agora dadauk iha Dili laran ne'e, Ministru bele hato'o hela ba AIFAESA atubele kontrola tok, mantolun ne'e iha  daladalan habai hotu kedas, Supermerkadu ida iha Maufelo ne'eba ne'e mantolu ne'e habai to'o iha estrada boot”, dehan nia.

Deputada ne'e observa, mantolun balun ne’ebé fa’an iha loja ka supermerkadu balun, sosa, lori ba da’an, hán la di’ak tanba nia laran ne'e ladi’ak.

Iha tempu governu anterior nian, sempre kontrola sasán sira ne'e iha loja ne’ebé mak nia prazu liu no at ona ne'e sira destroi tiha, maibé agora lahalo ona.

“Lahatene tanba osan mak iha ne'e ka, nusa ga, ita husik de'it ona. Lis mós dodook, laiha kontrola ida ba ida ne’e, oinsá ministru bele haree”, afirma nia. (*)