“Liga mós ba Dom Boaventura nian iha Same, uluk ita halo festa boot, iternasionál mós mai hotu, gasta osan barak atu mate, ha’u lahatene sura osan hira karik. Tuir lolos ita iha retornu tiha ona, ema loroloron tama sai, la kontrola, ita gasta osan atu fó servisu ba ema e atu hetan reseita, ita gasta osan saugati de'it”, dehan nia iha plenária Parlamentu Nasionál, tersa (03/08).
Dadauk, monumentu Estátua Dom Boaventura ne’ebe hari’i iha Luak, Postu Administrativu Same, Munisípiu Manufahi, iha tinan 2012, agora dadauk ligasaun ba fiu sira ne'e laiha, haris fatin inklui fatin ba ema atu tur mós laiha hotu ona.
Tanba, deputadu sira ba haree iha monimentu refere ne'e, governu konsege fó servisu ba ema barak, maibé laiha kontrola ba vizitante sira tama sai.
“Buat hothotu destruidu, lahatene uluk governu entrega monumentu ne'e ba se”, dehan nia.
Ho ida ne’e, husu ba Ministru Asuntu Parlamentar no Komunikasaun Sosiál (MAPKomS), Francisco Jerónimo atu hato'o hela ba Ministériu Turizmu no Komersiu Industria (MTCI) atu responsabiliza serbisu ne'ebé governu anterior sira halo.
“Dala ida tan ha’u husu ba seu Ministru Asuntu Parlamentar no Komunikasaun Sosiál, dehan ba Ministériu Turizmu Komersiu no Industria (MTKI), mai iha parlamentu, esplika tok, osan sira uluk ita gasta”, dehan nia.
Ba kestaun ne'e, Ministru Asuntu Parlamentar no Komunikasaun Sosiál (MAPKomS), Francisco Martins Jerónimo hatete, Governu rejista ona ejizensia ida ne'e, no sei haruka ba MTCI atubele responsabiliza.
Maibé mós sei informa ba Ministru MTCI, atu reuniaun plenária tuir mai, nia partisipa hodi bele ko’alia ho deputadu sira, atu esplika kona-ba relasaun ho turizmu komunitáriu, inklui fatin sira ne'ebe mak durante ne'e halo ona, maibé abandona hela, laiha atensaun. (*)