“Iha tinan ida ne’e ami sosa produtu lokál hanesan Kafé, maek no kamí hamutuk toneladas 200, atu exporta ba nasaun Tailándia, Indonézia no Xina, maibé iha situasaun Covid-19, nasaun Xina seidauk bele halo exportasaun”, dehan nia hafoin partisipa serimonia lansamentu iha Kolmera, tersa (15/06).
Produtu lokál hanesan maek sei halo produsaun ba kosmetik, biskuat Gerry, goma, mie Korea nomós buat seluk tan presiza.
Iha fatin hanesan, Ministru Agrikultor no Peska (MAP), Pedro dos Reis hatete, ministériu servisu hamutuk ho diresaun nasionál karentena sei halo aprosimasaun ho agrikultór sira ho floresta atu kuda produtu, atu kompaña lokál sira sosa hodi exporta ba rai liur.
“Ami sei halo esforsu oinsa atu emprezáriu sira ne’ebé atu exporta sasan bele mantein ho kualidade”, afirma nia.
Ba oin sei halo investimentu ne’ebé di'ak atu promove di'ak liu produtu lokál sira ne’e.
Aliende ne’e Prezidente Kámara Komérsiu Industria Timor-Leste (CCITL), Oscar Lima, agradese kompaña lokál sira ne’ebé iha vontade hodi hala’o nafatin atividade ekonomika.
“Husu ba emprezáriu sira atu nafatin mantein aten brani hodi hala’o atividade iha situasaun serka sanitária no estadu emerjénsia”, dehan nia.
Maibé husu atu emprezáriu sira kria kondisaun ne’ebé di’ak ba produtu atu nune’e exporta na’in sira bele iha konfiansa.
Kompaña lokál sira mak hanesan, Proloka, Hili Star, Unipessoal, Lda, Great Kastell Unipessoal, Lda, Esmelia Unipessoal, Lda, Timor Global, CC, Acelda, Kafé Lorosa'e, Black house 97 Unipessoal, Lda, Kafé Brisa Serena Unipessoal, Lda, Farm Pro Unipessoal, Lda, Kafé Wesae Unipessoal, Lda, Dili Vanili HMN Lda no Madarlin Unipessoal, Lda.
Nune'e produtu lokál ne’ebé atu halo exportasaun mak hanesan, kamí, maek, talas, cengkeh, kafe no nu’u. (*)