Tuir informasaun ne’ebé www.tempotimor.com, asesu iha pájina MTKI, kuarta (17/08) katak, iha kontratu ne’ebé Leader hetan husi Ministériu Turismu, Komérsiu no Indústria (MTKI) distribui ba aldeia 6 iha suku Comoro hanesan Aldeia Baia-Leste, Fomento I to’o III, Moris Foun no aldeia Golgota, iha Postu Administrativu Dom Aleixo, Munisípiu Díli.
Lista benefisiáriu ne’ebé mak empreza asina kontratu ho Governu hamutuk 17.033 benefisiáriu, aldeia Baia-Leste benefisiáriu hamutuk 776, Fomento I benefisiáriu 2.767, Fomento II iha benefisiáriu 3.238 Fomento III iha benefisiáiu 2.630, Moris Foun benefisiáriu 5.737 no aldeia Golgota totál benefisiáriu hamutuk 2.292.
Husi dadus sira ne’e, totál benefisiáriu ne’ebé mak simu ona Sesta Bázika husi Governu hamutuk 14.424 no falta dadus benefisiáriu hamutuk 2.609 mak seidauk simu sira-nia direitu.
Maibé distribuisaun durante ne’e la’o di’ak tanba hetan kooperasaun diretamente ho povu agrikultór, hodi sosa sira-nia produtu rasik atu fó fila ba povu.
“Leader nia ligasaun ho ita-nia agrikultór la’ós iha sesta-bázika de’it, Leader hanesan supermerkadu ida nia iha konesaun nanis ona ho agrikultór sira husi fatin oioin, tantu produtu fós, batar, foremungu, buat hothotu ligasaun ho Sesta Bázika ita iha konesaun antes no iha tempu Sesta Bázika”, dehan Pascoal.
Produtu lokál hanesan fós mai husi Vikeké, Covalima, Same, Maliana no Baukau, inklui produtu sira seluk, hanesan foremungu, batar-ikis no seluk tan.
Produtu ortikultura no ai-fuan maioria sosa husi povu agrikultór iha Aileu, Ainaro, Ermera, Baukau no Maliana. Alende animál hanesan karau no fahi, sosa husi komunidade sira, depois empreza prepara mak fahe ba benefisiáriu sira.
“Produtu sira ne’e, maioria ami sosa husi povu agrikultór sira, tanba ne’e ami garante katak ami-nia produtu maioria husi lokál”, hatete nia.
Durante distribuisaun Sesta Bázika iha aldeia 6 hanesan Baia-Leste, Fomento I, Fomento II, no Fomento III, Moris Foun no Aldeia Golgota, kompaña konsege emprega timoroan na’in-52, husi númeru refere la konta ho empregadu permanente sira.
“Sira na’in-52 ne’e ita rekruta hodi servisu durante prosesu distribuisaun Sesta BáZika, maoria sira servisu iha armajen, prepara produtu antes distribui ba komunidade sira, kona-ba saláriu ami selu tuir lei traballu nian no iha mós pagamentu ekstra ba sira ne’ebé servisu liu oras”, esplika nia.
Programa Sesta Bázika iha vantajen ne’ebé mak pozetivu tebes ba ekonomia povu nian, liliu povu agrikultór sira, tanba produtu ne’ebé mak sira produz, Governu iha polítika ne’ebé di’ak iha merkadu ba sira oinsá atu fa’an.
“Ami-nia haree programa Sesta-Bázika ne’e la’o di’ak no bele fó vantajen ba povu agrikultór, tanba maioria produtu sosa husi povu no fahe filafali ba povu, maske balu lamentavel, maibé maioria nia haree diak’, katak nia.
Ba empreza mós fó hanoin ba Governu atu finaliza lalais lista reklamasaun, atu nune’e empreza bele distribui ona ba dadus reklamante sira.
“Distribuisaun ami hala’o tiha, agora dadaun ami hein de’it dadus reklamasaun atu kontinua halo distribuisaun”, haktenik Kordenadór Jerál empreza Leader Lda.
Kona-ba produtu ne’ebé mak distribui, tuir regulamentu husi parte Governu define produtu lokál iha 75% hanesan fós, batar, foremungu, koto, manutolun, ikan, liss, na’an no restu husi pursentu refere mak produtu importadu.
Nu’udar distribuidór programa Sesta Bázika husi lansamentu iha loron-17 fulan-juñu, benefisiáriu sira simu ho kontente la halo reklamasaun kona-ba kualidade no kuantidade sesta-bázika. (*)
