Vendedór (fa'an-na'in) tomate iha merkadu Taibessi, Juvita da Costa Pereira hatete, durante governu implenta Estadu Emerjénsia (EE) ba dala-XI ho Serka Sanitária iha kapital Dili, rezulta produtu ne'ebé fa’an, ladun folin ona.

Durante ne'e sasán ladun folin ona, tanba laiha kompradór, no dadaun ne'e mós produtu tomate ne'ebé fa'an, hahú menus ona, tanba estrada ne’ebé aseau estadu taka, to'os na'in sira labele importa produtu mai Dili.

"Sasán ema atu hola ne'e mak laiha, tanba ema husi distritu mak la tama, depois ami mós la ba distritu, ne'ebé sasán mak laiha ami atu fa’an. Ida ne'e mak ami hakarak husu governu, se bele tau matan ba ami povu ki’ik, fa’an sasán mak hodi sustenta ami uma laran. Ida ne'e mak ami-nia difikuldade boot ida”, dehan nia ba jornalísta sira ho triste iha merkadu Taibessi, tersa (16/03).

Tanba, tomate ne’ebé nia fa’an, sosa tutan husi Baukau, maibé iha estadu emerjénsia ida ne'e, ema labele tama mai Dili, nune'e meiu seluk ne'ebé nia uza mak ba hasoru ema iha Metinaru mak transfere fali modo ba sira, maibé kuantidade la barak.

"Ne'ebé kolega sira lori mai, dala-ruma lori oituan-oitoan de'it, ne'ebé ami fahe malu oitoan-oituan ami fa'an. Depois osan ne'e, estadu emerjénsia hotu mak foin fó”, hatete nia.

Tomate ne'ebé nia sosa tutan husi ema seluk, balde ida ho folin U$8.00, maibé nia faan fali ho U$15.00, nune'e nia manan de'it U$2.00, restu selu hotu ba kereta ne’ebé nia aluga hodi transporta modo sira mai merkadu Taibessi.

"Sé bele karik governu esforsu atu ami ida fa'an sasán ne'e, ema husi ditritu bele fó dalan, semana ida bele dala rua ou tolu hanesan ne'e, sira aproveita lori sasán mai foti, para ami mós aproveita fa'an”, sujere Juvita.

Nune’e Vendedór Ozório Noronha Belo husi Munisípiu Baukau, sente la satisfás ho desizaun ne'ebé governu hasai, tanba difikulta tebes nia nu'udár ema negosiante ida oinsá mak bele hetan osan hodi sustenta moria família nian.

"Ba estadu emerjénsia ida ne'e, ami sente ladun kontente, la aseita, tanba ami nu'udár negosiante, ho bisnis ida ne'e mak lori fó han ami-nia fen ho oan. Ne'ebé estadu emerjénsia ida ne'e taka total ne'e, ami ladun satisfás, la monu ba ami nia laran”, nia lamenta.

Kona-ba rendimentu ne’ebé hetan minimu tebes, kompara situasaun normal sira uluk, fa'an to'o oras lorokraik bele hotu kedas, maibé ho Serka Sanitária ida ne'e, diferente.

"Sasán mós menus, nia folin mós ema aumenta. Ami fa'an tomate iha raga ida ho folin U$45, maibé balde ida ami fa'anU$15. Tomate sira ne'e, ami hola tutan fali to'o dala-tolu, bainhira fa'an la folin, kolega balu husu ami fó, sé laiha, ami fo haan fahi”, hatete nia.

Vendedór modo repollu husi munisípiu Aileu, Palimira Ximenes dehan, iha situasaun emerjénsia nia laran, nia la hetan liu osan, tanba ema la sosa, nune'e repollu sira ne'e dala ruma husik to'o dodok.

Repollu sira ho isin boot, nia fa'an ho folin U$1.25, maibé sira ne'ebé ho isin natoon, fa'an ho U$0.50 sentavu.

"Agora ne'e ami rai de'it iha ne'e, ema la hola, tanba ho emerjénsia ida ne'e, atu sai mós tauk, entaun ami-nia sasan sira ne'e mós la folin agora”, dehan Palmira.

Tanba ne’e husu ba governu atu taka de'it dalan iha fronteira, no loke estada iha Dili hodi nune'e populasaun bele la'o ba mai Munisípiu sira atubele sosa produtu sira hodi fa'an iha merkadu.(*)