Sekretáriu Estadu Kooperativa (SEKOOP), Elizário Ferreira dehan, funsionáriu tenke hatudu produtividade servisu ho profisionál liután, maske balu sei ajente, maibé sei transforma ba permanente atubele serví kooperativa ho di'ak liután.
"Ha'u husu ba ita-boot sira atu partisipa ativu liután, ba oin servisu barak mak sei iha baze, no ita-boot sira mak sei sai sentru ida ba SEKOOP nian iha baze atu bele fasilita informasaun ne'ebé kredivel", hatete SEKOOP, Elizário Ferreira durante halo diskursu abertura ba formandu sira iha Federasaun Hanai Malu (FHM), kinta (18/02).
Nia hatutan, formasaun ne'ebé hala'o ne'e, nu'udár kontinuasaun husi formasaun sira-ne'ebé molok ne'e hala'o ona, maibé formasaun iha nível munisípiu, formadór sira husi nasional mak fó, maibé iha postu administrativu ho suku sira, formadór sira munisípiu mak sei fó formasaun.
"Tanba ne'e, hotu-hotu tenke koñese kooperativa di'ak, labele ema ida servisu iha kooperativa, mais la koñese kooperativa", dehan nia.
Nia husu ba formandu sira atu rejista mós sai hanesan membru ba kooperativa sira iha munisípiu hotu-hotu, tanba ohin loron ema bele koñese kooperativa, tanba ema balu sakrífika sira-nia vida, tempu, no kuaze iha investimentu tomak durante tempu naruk mak foin hetan susesu.
"Ita-boot tenke hetan formasaun loron 10 ne'e, no partisipa halo di'ak atu nune'e bele iha koñesimentu di'ak liután. Labele sekretaria estadu ne'e selu ema 30-resin, besik 40 iha distritu mais toba de'it. Depois simu osan ne'e, osan povu nian. Ita-nia objetivu mak atu serví povu", hatete nia.
Elizário dehan, iha futuru SEKOOP mós sei hamosu organizasaun juventude ida ba iha kooperativa hotu-hotu, no formadór sira sei tún ba terrenu hodi reforsa malu atu ba to'o iha nível postu ho suku.
"Tanba ne'e, Ita-boot sira-nia partisipasaun iha formasaun ida-ne'e tenke ativu, tanba ita-boot sira atu tún ba fó formasaun", tenik nia.
Entretantu, SEKOOP mós planeia ona katak, sei fó apoiu mós ba osan perdiem kona-ba formasaun nian ba iha formadór sira, importante mak relata telatóriu atividade.(*)
