SEKOOP Prepara Formadór Na'in-46 Hala'o Programa Lori Joven Fila ba Kampu
Tempotimor (Dili)- Sekretáriu Estadu Kooperativa (SEKOOP) Elizário Ferreira, informa daudaun ne'e prepara ona formadór hamutuk ema na'in-46 hodi implementa programa lori joven sira ba kampu.
Nia dehan, programa lori joven fila ba kampu ne'e, nu'udár programa dahaat husi programa lima seluk ne'ebé SEKOOP, Elizário Ferreira kompromete sei implementa hotu durante mandatu.
"Iha programa dahaat maka, lori joven fila ba kampu. Ami iha ona formadór 46, preparadu ona atu kria kooperativa ba joven", Sekretáriu Estadu Kooperativa (SEKOOP) Elizário Ferreira, ko'alia iha Federasaun Hanai Malu (FHM), Lanud, Bairru-Pite, kuarta (17/02).
Nia esplika, programa kooperativa ba joven ne'e ho objetivu atu lori joven sira adere ba kooperativa mundiál ne'ebé durante ne'e Federasaun Hanai Malu (FHM) reprezenta TL ba aliansa kooperativa internasional dezde tinan 2012 liubá.
"Tanba ida-ne'e, joven sira mak sei eduka iha nível postu administrativu to'o suku sira oinsá mak haburas atividade ekonómika ne'e", dehan Elizário.(*)
