Hafoin haree tiha modelu karosa ne'e, governante ne'e aseita ka konkorda ho modelu ne'ebé tékniku sira produz, tanbá ho kondisaun ne'ebé di'ak no kualidade.
"Vizita ohin mai iha ne'e, atu haree karosa ida ne'e, no agora prosesu ne'e tama ona iha 75% hela oitoan de'it, atu konklui", hatete SEKoop, Elizário Ferreira ba jornalísta sira, iha Sentru Formasaun Dom Bosco Comoro, sesta (09/10).
Governante ne'e akresenta, kona-bá presu kada karosa lolo'os ho valór másimu mak Dollar Amerikanu $.1500.
"Ida ha'u deklara ne'e, bele halo esforsu hanesan másimu liu ona, no bele menus mos husi ida ne'e", dehan nia.
Iha faze dahuluk, SEKoop sei distribui uluk ba negosiante nain 25, ne'ebé bele sai hanesan baze, hodi kontribui.
Modelu ne'ebé tékniku sira halo, SEKoop aprova ona, maibé konstrusaun seidauk finál, tanbá foin mak atinje pursentu 75 (75%), husi totál konstrusaun.
"Atu bele kompleta nia fatin, tau naha nia fatin, atu bele asegura nia folin sira ne'e", dehan nia.
Iha fatin hanesan, tékniku iha Sentru Formasaun Dom Bosco, Jaime Olandino hatete, karosa ne'ebé sira prodúz ho medida (2x70), naruk metru rua no 70 cm.
"Karosa ne'e ami halo han tempu semana rua hanesan ne'e, bele hotu. Mais nia finishing loloos, seidauk", dehan nia.
Nia hatutan, atu prodúz karosa ida ho kualidade, presiza han tempu naruk, hodi bele foku didi'ak, atu nune'e iha kualidade ne'ebé di'ak.
"Se halo karosa 25, kalkulasaun ne'e, bele lori tempu durante fulan rua, mak bele remata", dehan nia.
Entretantu modelu karosa ne'e rasik, kompostu husi lampu ne'ebé instala ho nia enérjia, husi solár painel, hahán fatin, no ahi fatin ne'ebé produz ho materiál modernu, hanesan besi ho kalen. (*)
PUBLISIDADE