Deputadu husu Legalidade Ko’a Osan Veteranus $30 Kada Fulan

Deputada bankada FRETILIN, Maria Angelica rangel Deputada bankada FRETILIN, Maria Angelica rangel Foto Arkivu

Tempotimor (Dili)-Deputadu iha Parlamentu Nasionál husu ba governu atu klarifika didi’ak kona-ba politika ko’a veteranu sira-nia osan ho valor $30 kada fulan.

"Ba ha’u atu ko'a $30 dolar kada fulan hodi tau ba fundu investimentu tuir planu politiku governu nian, laiha problema, maibé ha’u hakarak husu baze legal iha ne'ebé atu ko'a ema nia osan $30 dollar ne'e," deklara Deputada Maria Angelica Rangel iha PN, Segunda (27/01).

Tuir dadus ne’ebé deputada ne’e iha, veteranus ne’ebé rejistradu kuaze na’in rihun 27.

“Entaun kada fulan ko’a veteranu sira-nia osan $30 dollar, fulan ida hamutuk $810 mill, nune'e tinan ida ko'a $9.7 milloes,” dehan nia.

Tan ne’e, deputada ne’e husu sa legalidade mak iha atu ko'a $30 dolar ba veteranu sira kada fulan no see mak atu jere.

Nia dehan, bainhira iha legalidade presiza defini kada veteranu ho idade ida ne'ebé tanba maioria veteranu ho idade tinan 60 ba leten.

“Se ko'a tiha sira-nia osan $30 dollar kada fulan ba investimentu, see loos mak atu hetan fali osan ne'e, iha lei presiza koalia halo klaru”.

"Se karik governu iha ona legalidade, dekretu lei no diploma ministerial ruma, tenke fó hatene mai parlamentu nasional atu bele hatene ko'a osan ne'e oinsa no ko'a kategoria ba veteranus ho idade hira no ko'a verenaus see-see nia osan,” dehan nia.

Ho informasaun refere, nia dehan, deputadu sira mós bele informa ba eleitór sira bainhira tuun ba baze hodi halo sosializasaun.

“Se ita laiha sosializasaun ruma mak derrepente ko'a de'it sira-nia osan ne'e ha’u hanoin defisil uitoan,” Angelica dehan.

Rate this item
(7 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.