Impase polítika ne'ebé la'o tinan naruk ona fó influénsia negativa ba investidór husi nasaun seluk sira atu investe iha Timor,  tanba laiha garante estabilidade iha rai laran.

Diretór Ezekutivu Asosiasaun HAK, Manuel Monteiro hatete, haree ba situasaun hanesan ne'e investidór sira laiha konfiansa mai iha Timor-Leste.

"Investor sira sei la mai. Ema mai investe ho osan barak pois la hetan lukru. Ema sei la mai," dehan nia, iha knaar fatin, Faról, Kuarta (22/1).

Ne'e duni, dalan di'ak atu hakotu impase polítika, úniku halo diálogu, tanba Timor ne'e  atu sé mak ukun, sempre iha ajenda rua ne'ebé importante maka liberta pátria totál no liberta povu.

Iha fatin seluk, akademista Francisco Martins 'Mausoro' dehan, bainhira investidór estranjeiru iha konfiansa pontu importante mak estabilidade.

"Estabilidade polítika la di'ak ema investidór sira sei laiha konfiansa. Laiha ema ida ne'ebé brani halo investementu kuandu laiha garantia estabilidade inklui polítika," dehan nia, iha knaar fatin, Universidade Dili (UNDIL).

Impase polítika la'o ona iha Timor-Leste dezde 2017 too agora, ne'ebé afeta ba setór ekonomia no halo emprezariu nasionál iha ameasa finanseiru, inklui sei hamate konfiansa investidór husi rai li'ur.(*)