Tuir informasaun ne'ebé www.tempotimor.com asesu iha loron 26 fulan-janeiru tinan-2023 husi pajina ofisial Programa Nasionál Dezenvolvimentu Suku (PNDS) katak, UNP refere pertense ba benefisiária Laurinda Fernandes ho idade 57, ne'ebé ingrega husi Governu iha fulan-jullu tinan 2022.
Maibé, akontesimentu ne’e la rezulta ema kanek no kondisaun uma mós ladun estraga, tanba ahi lakan estragus de'it plafon husi triplek no mobiliarius seluk hanesan ropa, kulsaun no Armariu roúpa, maibé benefisiária ho nia bei-oan mós konsege salva sasan balun.
Hafoin akontesimentu, Sekretária Ezekutiva ST-PNDS, Claudinha Soares Pinto hamutuk ho ekipa tékniku Nasionál diretamente to’o kedas iha fatin hodi observa no buka tuir kauza husi ahi han uma refere.
Tuir informasaun ne'ebé ekipa hetan iha tereñu bazeia ba kronologia katak, insendiu ne’e la’os kauza husi liña eletrisidade, tanba ne'e sei buka hela ninia motivu husi akontesimentu ne'e.
“Implementasaun atividade UNP ne’e rasik sempre iha koordenasaun ho entidades hotu-hotu inklui ho parte EDTL hodi atende ba prosesu instalasaun eletrisidade ba uma ne’e rasik. Horseik, ekipa iha tereñu halo kedas koordenasaun ho parte EDTL no ekipa EDTL diretamente to’o duni iha fatin ida ne’e no hala’o kedas inspensaun e nota katak kauza husi akontesimentu ne’e la’os impaktu husi liña eletrisidade ne’ebé instala husi parte EDTL", nia afirma.
Tanba ne'e, ekipa PNDS sei hato’o relatóriu ba Autoridade lokál hodi prosesu ba oin, nune'e bele halo fali reabilitasaun, tanba kondisaun fiziku uma di'ak hela inklui kalen ne'ebé taka ba uma refere mós di'ak hela, maibé desizaun ba prosesu hein husi superior.
"Hanesan tékniku ami hakarak mai garantia de’it kualidade, tanba obra ida ne’e kontinua implementa hela iha teretóriu Timor laran tomak, nune'e mós ida ne’e sai hanesan referensia ida mai ami atu ba futuru bele haree mos ba matérial konstrusaun hirak ne’ebe tuir spesifikasaun katak kualidade duni hodi bele garantia labele hetan estragus maka'as husi akontesementu hirak hanesan ne’e no bele garantia seguru ba benefisiarius sira", nia afirma
Enkuantu ba asidente ne'e Autoridade Protesaun Sivil, liuhusi Asesor Prezidente Autoridade Munisípiu Bobonaru fo ona apoiu ai-han ba vítima. (*)
