Tuir kronolojia, ne’ebé www.tempotimor.com asesu husi pájina ofisiál BTL,E.P katak, akontesementu ne'e iha loron 16 fulan-janeiru tinan-2023, pur-volta tuku 16:50 otl, bainhira ekipa hamutuk ho estajiáriu sira hala’o hela servisu normalizasaun ba koneksaun ilegál 20 iha tereñu mak hetan tuda, husi komunidade balun, hodi rezulta estajiáriu na'in-ida hetan bubu iha parte liman.

Komunidade ne’ebé durante halo koneksaun bee ho ilegalmente mak tuda, tanba sira lakohi koopera ho tékniku sira atu normaliza ba ligasaun ilegál.

Maibé, hafoin mosu problema, ekipa BTL, E.P hato’o kedas ba parte seguránsa Komandu Polísia Nasionál Timor-Leste (PNTL) Baukau, konsege detein kedas suspeitu iha sela hodi kumpri durante oras 72.

Enkuantu parte seguránsa PNTL Baukau lori kedas vítima ba Ospitál Referál Eduardo Ximenes (HoREX-sigla portugés) Baukau hodi hetan tratamentu imediatu, ne'ebé rezultadu hatudu kondisaun la grave.

Hafoin akontese liu tiha, parte família husi autór husu deskulpa ba ekipa, BTL E.P no husu vítima atu rezolve tuir dalan família.

Enkuantu koneksaun bee ilegál ne’ebé komete hosi uma-kain 20 iha Bugate parte estrada kraik, tékniku sira konsege normaliza ona no balun seidauk, maibé iha tempu badak sei normaliza hotu, nune’e labele prejudika presaun bee, atu ema hotu bele asesu.

Tanba, koneksaun ilegál ne’e, kontra regras BTL, E.P nian, bazeia ba Diploma Ministeriál númeru 4/2004 11 fulan-fevereiru, iha artigu 27 númeru 1, alinea e, ne’ebé ko’alia kona-ba labele uza mákina ou sanyo hodi liga ilegalmente ba kanu transmisaun no distribuisaun bee, no Diploma ne’e mós iha artigu 14 númeru 1 alinea d, sita mos kona-ba ligasaun ilegál.

Regras hirak ne’e, bandu atu ema labele halo ligasaun bee ho ilegalmente, tantu liuhosi uza mákina ou sanyo no fura ku’ak kanu transmisaun no distribuisaun nian, taaba aktu hirak ne’e, kontribui hamenus presaun bee, nune’e bee la sufisiente ba ema hotu. (*)