“Iha tinan 2020 ita orsementa ba 2021 ho osan miliaun $3.5 maibé iha tinan 2021 iha sirkunstánsia oioin nune’e ita SEKOOP fó osan millaun $2.8 ba sira e tinan 2022 ita orsamenta hela rihun-atushitu atu oferese ba Hanai Malu atubele kompleta osan millaun $3.5 ne’ebé mak projeta iha 2020 atu nune’e asegura kapitalizasaun ba setór ekonómiku liliu setór Kooperativa”, dehan Sekretáriu Estadu Elizário Ferreira ba www.tempotimor.com iha Salaun FHM, Bairo Pite, sesta (22/07).

Bainhira oferese funduz hirak ne'e SEKOOP lidera diretamente kona-ba oinsá atu asegura nia akuntabilidade hodi asegura sira-nia orsamentu ida ba di'ak.

“Nune'e atu asegura nia jestaun ida di'ak, lidera reuniaun ida-ne'e atu fasilita informasaun ba sira atubele asegura akuntabilidade ida di'ak ho espiritu transparante no serbí ida di'ak ba asegura asesu membru finanseiru sira”, hatutan nia.

Alende Prezidente Federasaun Hanai Malu (FHM), João Belo hatete, SEKOOP apoiu osan millaun $2.8 ba FHM inklui hodi halo jestaun ba Federasaun nian.

“SEKOOP nia apoiu mai iha tinan ida-ne'e, millaun $2.8 ne'ebé fó fiar ba Federasaun atu halo jestaun ba buat sira ne'e nomós akompaña husi SEKOOP ninia nafatin, tanba-ne'e mak assuntu balun hanesan enkontru sira hanesan ne'e lidera diretamente husi SEKOOP”, dehan nia.

Tanba Sekretária Estadu Kooperativa nu'udar kna’ar reguladora no akompañador iha prosesu tomak.

Ba reuniaun kompleta akuntabilidade oinsá atu ajuda Kapitál ne'ebé mak SEKOOP reforsa ba Federasaun Hanai Malu (FHM) inklui mós kapitál membru sira-nian.

Haree ba kapasidade sira ne'e Kooperativa Kréditu Uniaun 18 mak sai ona membru FHM no dadaun ne'e akomoda ona osan millaun $26.2 iha Timor laran tomak. (*)