Tuir informasaun ne’ebé www.tempotimor.com , asesu iha pájina AIFAESA, sesta (22/07) katak, Delegasaun AIFAESA ne'ebé lidera hosi Sub-Inspetór Jerál, Eng. Dionísio Neto da Silva, akompaña husi Xefe Gabinete Inspetór Jerál, Filipe Gomes, Diretór DPORAL, Ângelo Edmundu Belo, Xefe Divizauan Informasaun Públiku, Teodósio de Rosa A. no Funsionário AIFAESA, Sandro Luis Corte-Real, hala'o sorumutu ho Dirijente Balai-POM, Kupaun, Tamran Ismail, hamutuk ho Responsavél Diresaun sira, nune'e mós akompañamentu hosi delegasaun BPOM Jakarta-Indonezia.

Ba objetivu husi sorumutu ne'ebé AIFAESA hala'o ho Balai-POM, Kupaun-Indonézia ne'e atu koordena servisu kona-bá kooperasaun tékniku iha area laboratóriu nian, liliu kona-ba amostra sira ne'ebé inspetór sira sei rekolla hodi haruka ba halo analiza no teste laboratóriu iha BPOM-Kupang, Indonézia.

Reprezenta Inspetór Jerál AIFAESA, Sub-Inspetór Jerál, Dionísio Neto da Silva hatete, kooperasaun ne'e importante tebes, tanba atubele garante liután ba misaun AIFAESA nian, nu'udar autoridade ne'ebé asegura no garante kualidade alimentár ba konsumedór sira, nune'e mós promove konkorénsia leal ba operadór ekonómika sira.

Kooperasaun ida-ne'e mós, AIFAESA husu apoiu no fasilita hodi garante ba kualidade produtu sira no bele asegura konsumedór sira husi risku alimentár sira ne'ebé bele prejudika ba saúde públiku.

Lideransa masimu Balai-POM, Kupaun-Indonézia, Tamran Ismail hatete, Balai-POM iha komitmentu hodi kria relasaun ida-ne'e atu fó apoiu no fasilita AIFAESA iha área laboratóriu kona-ba teste amostra sira inklui kapasita tékniku sira liuhusi treinamentu no seluk-seluk tan.

BPOM-Indonézia nafatin hein no husu ba AIFAESA no estadu Timor-Leste atu aselera kona-ba Memorandu of Understanding (MoU) atu nune'e kooperasaun ida-ne'e bele la'o ho di'ak liután.

Enkuantu sorumut ne'e rasik, Ekipa BPOM halo aprezentasaun ba servisu sira ne'ebé BPOM halo tuir kompeténsia sira ne'ebé iha no oinsá bele halo kontrolu ne'ebé di'ak no fó autorizasaun ka sertifikasaun ba produtu sira hodi komersializa iha merkadu, hahú hosi faze produsaun to'o komersializasun.

Aleinde realiza tiha diskusaun ba koordenasaun servisu ne'e, Delegasaun AIFAESA mós iha oportunidade hodi kontinua kedas, vizita ba laboratóriu Balai-POM Kupang nian iha resintu edifisiu Balai-POM, Kupaun-Indonézia. (*)